'ఎట్‌ నర్తనశాల' సినిమాలో హీరోయిన్‌గా నటిస్తోన్న ముద్దుగుమ్మ యామినీ భాస్కర్‌ ఇప్పుడు టాలీవుడ్‌ హాట్‌ టాపిక్‌ అయ్యింది. రీసెంట్‌గా విడుదలైన ఈ సినిమాలోని 'పిచ్చి పిచ్చిగా నచ్చావురా..' వీడియో సాంగే అందుకు కారణం అని చెప్పొచ్చు. ఆ సాంగ్‌లో అమ్మడి హాట్‌ హాట్‌ అందాల ప్రదర్శనే అందరి నోటా ఈ బ్యూటీ పేరు మార్మోగిపోతోంది.
అయితే ఈ బ్యూటీకి ఇదేం తొలి చిత్రం కాదండోయ్‌. గతంలో 'కీచక' తదితర చిత్రాలలో నటించింది. అయితే పెద్దగా రిజిస్టర్‌ కాలేదు. 'కాటమరాయుడు' చిత్రంలోనూ ఈ బ్యూటీ నటించింది. ఇంతకీ ఈ బ్యూటీ ఎక్కడి నుండో దిగుమతి కాలేదు. అసలు సిసలు పదహారణాల తెలుగమ్మాయి. పుట్టింది, పెరిగింది, చదివింది అంతా విజయవాడలోనే. చిన్నతనం నుండీ సినిమాలపై ఆశక్తి ఉంది. ఆ ఆశక్తికి కుటుంబ సభ్యుల ప్రోత్సాహం తోడై, ఇదిగో ఇంతవరకూ వచ్చింది.
'నర్తనశాల' సినిమా యామినీ భాస్కర్‌కి మంచి గుర్తింపే తెచ్చి పెట్టేలా ఉంది. నాగశౌర్య హోమ్‌ బ్యానర్‌లో రూపొందుతోన్న ఈ చిత్రం ఈ నెల 31న ప్రేక్షకుల ముందుకు రానుంది. ఈ సందర్భంగా జరుగుతున్న ప్రమోషన్స్‌లో యామినీ భాస్కర్‌ జోరుగా పాల్గొంటోంది. ముఖ్యంగా ఆమె నటించిన ఆ వీడియో సాంగ్‌కే ఎక్కువ రెస్పాన్స్‌ వస్తోంది.
అనుకోకుండా ఈ బ్యూటీకి ఈ సినిమాలో ఆఫర్‌ దక్కిందట. ప్రాధాన్యత ఉన్న పాత్రే కాకుండా, కొన్ని చోట్ల కాస్త చేతి వాటం కూడా చూపించాల్సి వచ్చిందట. అంటే యాక్షన్‌ సన్నివేశాల్లో కూడా నటించానని ఈ ముద్దుగుమ్మ చెబుతోంది. చెబుతోంది సరే, అమ్మడు తన టాలెంట్‌ ఎలా ప్రదర్శించిందో చూడాలంటే ఆగస్టు 31 వరకూ వేచి చూడాల్సిందే.!
