'డీజల్‌తో నడిచే బండిని చూసుంటావ్‌.. పెట్రోల్‌తో నడిచే బండిని చూసుంటావ్‌.. కానీ ఇది లిక్కర్‌తో నడిచే బండి గుద్దితే అడ్రస్‌ ఉండదు..' అంటున్నాడు కార్తికేయ. ఆయన నటిస్తున్న తాజా చిత్రం '90 ఎమ్‌ ఎల్‌' లోనిదీ డైలాగ్‌. తాజాగా ఈ సినిమా నుండి టీజర్‌ వదిలారు. పాల సీసాలో మందు మిక్స్‌.. చుట్టూ మందు బాటిల్స్‌ వాటిపైన హాయిగా పడుకున్న మన హీరో.. ఇలా కొన్ని పోస్టర్లు విడుదల చేసి ఆసక్తి కలిగించారు గతంలో.
ఇక తాజాగా వదిలిన టీజర్‌ ఆ పోస్టర్స్‌కి అసలు సిసలు మీనింగ్‌ ఇస్తోంది. మన హీరో పక్కా డ్రింకర్‌. దేవదాస్‌ లెక్కన్నమాట. జేసుదాస్‌ వంటి కొడుకు పుడతాడనుకుంటే, దేవదాస్‌ లాంటి కొడుకు పుట్టాడేంట్రా.. అని పేరెంట్స్‌ ఫీలవుతుంటారు. ఈ లోగా యాక్షన్‌ సీన్‌.. ఆ యాక్షన్‌ సీన్‌లోనే మన హీరో పైన చెప్పిన డైలాగ్‌ చెబుతాడు. బ్యాక్‌ గ్రౌండ్‌లో వచ్చే మ్యూజిక్‌ దడ దడలాడించింది.
'రోజుకు ఎంతేస్తావ్‌.. అంటే, పూటకో 90 ఎమ్మెల్‌ సార్‌.. ఏ క్వాటర్‌ ఇస్తే తాగవా..? అని అడిగితే, డాక్టర్‌ 90 మాత్రమే తీసుకోమన్నారు సార్‌..' అని ఆలీ, కార్తికేయ మధ్య సాగే ఆసక్తికరమైన సంభాషణలతో టీజర్‌ ముగుస్తుంది. అక్కడి యాక్షన్‌కి కరెక్ట్‌ సౌండింగ్‌ ఇచ్చింది. అనూప్‌ రూబెన్స్‌ మ్యూజిక్‌ అందించిన ఈ సినిమాకి శేఖర్‌ రెడ్డి దర్శకత్వం వహిస్తున్నారు. కార్తికేయ క్రియేటివ్‌ వర్క్స్‌ బ్యానర్‌లో రూపొందుతోంది. ఇటీవల 'గ్యాంగ్‌లీడర్‌' సినిమాలో విలన్‌గా కనిపించి మెప్పించిన కార్తికేయకు ఇదో డిఫరెంట్‌ మూవీ అయ్యేలానే ఉంది.
