ఇటీవల సంచలన విజయం సాధించిన 'రంగస్థలం' చిత్రంలో చిట్టిబాబుకు అన్నయ్యగా, కుమార్‌బాబు పాత్రలో కనిపించిన ఆది పినిశెట్టి హీరోగా తెరకెక్కుతోన్న చిత్రానికి టైటిల్‌ ఫిక్స్‌ చేసింది చిత్ర యూనిట్‌. ప్రముఖ రచయిత కోన వెంకట్‌ నిర్మాతగా కోన ఫిలిం కార్పొరేషన్‌ బ్యానర్‌లో ఈ చిత్రం రూపొందుతోంది. హరినాధ్‌ దర్శకత్వం వహిస్తున్నారు. 

తాజాగా ఈ సినిమా టైటిల్‌ని నేచురల్‌ స్టార్‌ నాని ట్విట్టర్‌ ద్వారా విడుదల చేశాడు. ఇంతకీ టైటిలేంటో తెలుసా? 'నీవెవరో'. నాని, ఆది పినిశెట్టి కలిసి నటించిన 'నిన్నుకోరి ' సినిమా మంచి విజయం అందుకుంది. అదే తరహాలో ఈ టైటిల్‌ కూడా ఉంది. 'మా ప్రియమైన అరుణ్‌ నటించిన కొత్త సినిమా టైటిల్‌ 'నీవెవరో' టైటిల్‌ పోస్టర్‌ని విడుదల చేస్తున్నందుకు చాలా సంతోషంగా ఉందనీ..' చిత్ర యూనిట్‌కి ఆల్‌ ది బెస్ట్‌ చెప్పాడు నాని. 

ఈ సినిమాలో ఆది సరసన తాప్సి నటిస్తోంది. గతంలో ఆది, తాప్సి 'గుండెల్లో గోదారి' చిత్రంలో జంటగా నటించారు. తాప్సితో పాటు ఈ సినిమాలో 'గురు' ఫేం రితికాసింగ్‌ మరో హీరోయిన్‌గా నటిస్తోంది. కమెడియన్‌ వెన్నెల కిషోర్‌ పూర్తి స్థాయిలో ఇంపార్టెన్స్‌ ఉన్న పాత్రలో కనిపించబోతున్నాడీ సినిమాలో. ఇకపోతే ఆది 'రంగస్థలం' సినిమాతో తెలుగు ఆడియన్స్‌కి చాలా చాలా దగ్గరైపోయాడు. 'రంగస్థలం' ఎఫెక్ట్‌తో ఆదికి ఈ సినిమా కలిసొస్తుందని భావించొచ్చు. 

ఆది మంచి నటుడు. తమిళంలో ఆది నటించిన పలు చిత్రాలు తెలుగులో విడుదలై మంచి విజయం సాధించిన సందర్భాలు కూడా ఉన్నాయి. త్వరలోనే ఈ సినిమా ప్రేక్షకుల ముందుకు రానుంది.