ఆది సాయికుమార్‌ నటిస్తున్న తాజా చిత్రం 'జోడీ'. వాస్తవానికి ఈ సినిమా ఎప్పుడో విడుదల కావల్సి ఉంది. కానీ, కొన్ని కారణాలతో విడుదల ఆలస్యమైంది. త్వరలోనే రిలీజ్‌ చేసేందుకు ప్లాన్‌ చేస్తున్నారు. ఈ సందర్భంగా 'జోడీ' టీజర్‌ వదిలారు. టీజర్‌ చాలా కూల్‌గా ఉంది. రొమాంటిక్‌ ఎంటర్‌టైనర్‌గా కనిపిస్తోంది. కమెడియన్‌ సత్య, ఆది మధ్య డైలాగులు నవ్వులు పూయిస్తున్నాయి. ఇంతకీ ఈ సినిమాలో ఆదితో జోడీ కడుతున్న ముద్దుగుమ్మ ఎవరో తెలుసా.? శ్రద్ధా శ్రీనాధ్‌. అదేనండీ 'జెర్సీ' సినిమాతో హల్‌చల్‌ చేసిన ముద్దుగుమ్మ. 'నన్ను గుర్తు పెట్టుకోండి.. నా పేరు శ్రద్ధా శ్రీనాధ్‌..' అంటూ 'జెర్సీ' టైంలో తెగ డబ్బా కొట్టుకుంది కదా.. అ భామే ఇప్పుడు ఆదితో జోడీ కడుతోంది.
నిజానికి తెలుగులో శ్రద్ధా నటించిన తొలి సినిమా 'జోడీ'నే. కానీ 'జెర్సీ' ముందుగా విడుదలైంది. మొత్తానికి పరిచయమున్న భామే. టాలెంట్‌ పరంగా ఆల్రెడీ కొన్ని మార్కులు కొట్టేసింది. యాక్టింగ్‌తో పని లేకుండా ఎక్స్‌ప్రెషన్స్‌తోనే పిచ్చెక్కించే ఈ భామ ఇప్పుడు రొమాంటిక్‌ లుక్స్‌తో మరోసారి పిచ్చెక్కించేందుకు ఆదితో 'జోడీ'గా వచ్చేస్తోంది. నానికి 'జెర్సీ'తో మంచి హిట్‌ ఇచ్చిన శ్రద్ధా, ఆదికి 'జోడీ'తో కూడా హిట్‌ ఇస్తుందేమో చూడాలిక. అన్నట్లు ఈ రెండు సినిమాల టైటిల్స్‌కీ మొదటి అక్షరం 'జె' కావడం విశేషం. ఈ సెంటిమెంట్‌ వర్కవుట్‌ అయితే, చాలా కాలంగా హిట్‌ కోసం ఎదురు చూస్తున్న ఆదికి 'శ్రద్ధ'గా హిట్‌ దక్కేసినట్లే.
