ఈ మధ్య అన్నీ భాషలలో రీమేక్ సినిమాల జోరు కొనసాగుతోంది. ఒకవైపు తమిళ, మలయాళ సినిమాలను మన తెలుగు ఫిలిం మేకర్లు రీమేక్ చేస్తుంటే, మరోవైపు మన తెలుగు హిట్ సినిమాలను హిందీలోకి రీమేక్ చేస్తున్నారు. ఇప్పటికే నాని 'జెర్సీ' సినిమా, విశ్వక్ సేన్ నటించిన 'హిట్' సినిమాను హిందీలో రీమేక్ చేస్తున్నారు. తాజాగా ఈ లిస్ట్ లోకి 'ఏజెంట్ సాయి శ్రీనివాస ఆత్రేయ' కూడా చేరిందని సమాచారం.
ఆర్ ఎస్ జె స్వరూప్ దర్శకత్వంలో నవీన్ పోలిశెట్టి హీరోగా నటించిన చిత్రం 'ఏజెంట్ సాయి శ్రీనివాస ఆత్రేయ'. 2019 లో రిలీజ్ అయిన ఈ చిన్న బడ్జెట్ సినిమా బాక్సాఫీస్ దగ్గర ఘన విజయం సాధించడమే కాకుండా అటు హీరోకి ఇటు దర్శకుడికి చాలా మంచి పేరు తీసుకువచ్చింది. కామెడీ థ్రిల్లర్ జోనర్ లో తెరకెక్కిన ఈ సినిమాకు మంచి ప్రశంసలు లభించాయి. ఈ సినిమా హిందీ రీమేక్ హక్కులను ఒక బాలీవుడ్ ప్రొడక్షన్ హౌస్ తీసుకున్నారని టాక్ వినిపిస్తోంది. త్వరలోనే ఈ సినిమాకు సంబంధించిన హీరో హీరోయిన్లు, టెక్నీషియన్ల వివరాలు వెల్లడవుతాయని సమాచారం.
మరి హిందీ వెర్షన్ కు ఒరిజినల్ దర్శకుడు ఆర్ ఎస్ జె స్వరూప్ పని చేస్తారా లేదా మరో డైరెక్టర్ కు ఆ బాధ్యతలు అప్పగిస్తారా అన్నది వేచి చూడాలి. నవీన్ పోలిశెట్టి తెలుగులోనే కాకుండా గతంలో హిందీ సినిమాల్లో కూడా నటించాడు. మరి నవీన్ పోలిశెట్టి రీమేక్ లో నటిస్తాడా లేదా అనేది కూడా ఆసక్తికరమే. ఏదేమైనా మన తెలుగు సినిమాలు ఇలా ఇతర భాషల ఫిలింమేకర్ లకు నచ్చడం గొప్ప విషయమే అనుకోవాలి.
