విడుదలకు ముందే 'అజ్ఞాతవాసి' రికార్డులు బద్దలు కొట్టేస్తోంది. ప్రీ రిలీజ్‌ బిజినెస్‌ ఇప్పటికే కనీ వినీ ఎరుగని రీతిలో జరుగుతోంది. అలాగే ఈ సినిమాని అమెరికాలో 209 సినీ మార్క్‌ లొకేషన్స్‌లో రిలీజ్‌ చేస్తున్నారు. 

ఇంతవరకూ ఈ రికార్డు 'బాహుబలి ది కన్‌క్లూజన్‌' కే వుంది. అయితే 'బాహుబలి ది కన్‌క్లూజన్‌' కౌంట్‌ ఎంతో తెలుసా? 126 సినీ మార్క్‌ లొకేషన్స్‌. అదే ఇంతవరకూ రికార్డ్‌ అనుకుంటే, ఆ రికార్డ్‌ని 'అజ్ఞాతవాసి' ఏ రేంజ్‌లో దాటేసిందో చూశారా? అదీ పవన్‌ కళ్యాణ్‌ స్టామినా అంటే, ఓవర్సీస్‌లో పవన్‌కి తిరుగే లేదు. అందులోనూ పవన్‌ - త్రివిక్రమ్‌ కాంబినేషన్‌ అంటే ఇక్కడే కాదు అక్కడ మరీ క్రేజ్‌ ఎక్కువ. దాంతో ఈ సినిమా ప్రీ రిలీజ్‌ రికార్డులు బద్దలైపోతున్నాయి. ఓపెనింగ్స్‌ పరంగా అనూహ్యమైన అంచనాలున్నాయి. 

ఇంతవరకూ త్రివిక్రమ్‌ - పవన్‌ కాంబినేషన్‌లో తెరకెక్కిన 'జల్సా', 'అత్తారింటికి దారేది' సినిమాల్ని మించిన భారీ అంచనాలు ఈ సినిమాపై ఉన్నాయి. ప్రస్తుతం వారణాశిలో చివరి భారీ షెడ్యూల్‌ని పూర్తి చేసుకున్న 'అజ్ఞాతవాసి' టీమ్‌ రామానాయుడు స్టూడియోకు చేరుకుంది. అక్కడ తుది మెరుగులు పూర్తి కాగానే సినిమా నిర్మాణానంతర కార్యక్రమాలు జరుపుకోనుంది. అనిరుధ్‌ మ్యూజిక్‌ ఈ సినిమాకి అదనపు ఆకర్షణ కానుంది. మాంచి మ్యూజిక్‌ టేస్ట్‌ ఉన్న పవన్‌ కళ్యాణ్‌, త్రివిక్రమ్‌ దగ్గరుండి టాలెంటెడ్‌ అనిరుధ్‌తో అభిమానులు మెచ్చుకొనే ట్యూన్‌ కట్టించారు. 

ఇప్పటికే ఓ సాంగ్‌ని శాంపిల్‌గా బయటికి వదిలారు. ఆ సాంగ్‌ యూ ట్యూబ్‌లో చేస్తోన్న సందడి అంతా ఇంతా కాదు. ఇకపోతే పవన్‌ కళ్యాణ్‌ లుక్‌ కూడా చాలా హ్యాండ్‌సమ్‌గా క్లాస్‌గా ఉండనుంది ఈ సినిమాలో. అనూ ఇమ్మాన్యుయేల్‌, కీర్తి సురేష్‌ ఇద్దరు ముద్దుగుమ్మలతో ఆన్‌స్క్రీన్‌ రొమాన్స్‌ చేయబోతున్నాడు పవన్‌ కళ్యాణ్‌. జనవరి 10న ఈ సినిమా వరల్డ్‌ వైడ్‌గా విడుదల కాబోతోంది.