'అఖిల్‌' సినిమాతో నిరాశపరిచిన అక్కినేని అందగాడు అఖిల్‌ ఇప్పుడు 'హలో' సినిమా ద్వారా రాబోతున్న సంగతి తెలిసిందే. ఈ సినిమా డిశంబర్‌ 22న ప్రేక్షకుల ముందుకు రానుంది. కాగా ఈ సినిమాకి సంబంధించిన ప్రతీ ప్రమోషన్‌ చాలా కొత్తగా చేస్తున్నారు. సినిమా నుండి ఒక్కో పోస్టర్‌ విడుదలవుతోంది. 

విడుదలైన పోస్టర్‌లోని ఒక్కో క్యారెక్టర్‌నీ అఖిల్‌ ఇంట్రడ్యూస్‌ చేయడం కొత్తగా ఉంది. మొదట హీరోగా అఖిల్‌ పోస్టర్‌ విడుదలైంది. తర్వాత రమ్యకృష్ణ, జగపతిబాబు.. అఖిల్‌తో కలిసి ఉన్న పోస్టర్‌ విడుదలైంది. ఈ పోస్టర్‌కి 'సే హలో టు అమ్మా నాన్న..' అంటూ అఖిల్‌ వారిని ఇంట్రడ్యూస్‌ చేశాడు. 

లేటెస్టుగా ఈ సినిమాలో మరో క్యారెక్టర్‌ అయిన అజయ్‌ పోస్టర్‌ విడుదలైంది. ఈ పోస్టర్‌తో 'సే హలో టు రిషి' అంటూ అఖిల్‌ అజయ్‌ క్యారెక్టర్‌ని పరిచయం చేశాడు. ఇంకా ఎన్ని క్యారెక్టర్స్‌ని అఖిల్‌ పరిచయం చేస్తాడో కానీ, ఈ 'సే హలో' కాన్సెప్ట్‌ మాత్రం భలే ఉందిలే. దీనికి మంచి రెస్పాన్స్‌ వస్తోంది. ఇకపోతే 'మనం' చిత్రాన్ని తెరకెక్కించిన విక్రమ్‌.కె.కుమార్‌ ఈ చిత్రానికి దర్శకత్వం వహిస్తున్నారు. కళ్యాణీ ప్రియదర్శిని హీరోయిన్‌గా నటిస్తోంది. అఖిల్‌కి 'హలో' సినిమా రీ లాంఛింగ్‌ మూవీగా అభివర్ణించారు నాగార్జున. నాగార్జున ఈ సినిమాని అన్నపూర్ణ స్టూడియోస్‌ బ్యానర్‌లో నిర్మిస్తున్నారు. విక్రమ్‌ దర్శకత్వంలో తెరకెక్కిన 'మనం' మంచి విజయాన్ని అందుకుంది. 

అందుకే ఈ కాంబినేషన్‌ అంటే అంచనాలు భారీగా ఉన్నాయి. రొమాంటిక్‌ యాక్షన్‌ ఎంటర్‌టైనర్‌గా తెరకెక్కుతోంది. పోస్టర్స్‌తో దుమ్ము దులిపేస్తున్నాడు ఇప్పటికే అఖిల్‌. టీజర్‌కీ రెస్పాన్స్‌ బాగుంది. ఇక సినిమా ఎలా ఉండబోతోందో త్వరలోనే తెలియనుంది.