అజిత్‌ హీరోగా వస్తోన్న చిత్రం 'వివేగం'. ఈ మధ్య అజిత్‌ విజయాలకు తిరుగే లేదు. ఒరిజినల్‌ గెటప్‌తో తెగ హోరెత్తించేస్తున్నాడు అజిత్‌. 'వీరమ్‌' వేదాలమ్‌' సినిమాలతో ఓ రేంజ్‌ హిట్స్‌ని తన ఖాతాలో వేసేసుకున్నాడు అజిత్‌. ఈ రెండు సినిమాలు ఒకదానికొకటి పోటీ అని చెప్పుకోవాలి. ఆ రెండు సినిమాల్లోనూ అజిత్‌ నటన ఆ రేంజ్‌లో ఉంటుంది. యాక్షన్‌ సీన్స్‌ అదిరిపోయేలా ఉంటాయి. ఈ రెండు సినిమాలను తెరకెక్కించిన డైరెక్టర్‌ శివ దర్శకత్వంలోనే తాజా చిత్రం 'వివేగం' తెరకెక్కుతోంది ఈ సినిమా టైటిల్‌ కూడా అదే తరహాలో ఉంది. సినిమాలో యాక్షన్‌ అయితే అంతకుమించిన స్థాయిలో ఉండబోతోందట. ఫస్ట్‌లుక్‌ పోస్టర్‌ చూస్తేనే ఆ విషయం అర్ధమయిపోతోంది. ఈ సినిమా టీజర్‌ని ఈ నెల 11న విడుదల చేయనున్నారట. తమిళ తంబీలు అజిత్‌ సినిమా కోసం ఎంతో ఆశక్తిగా ఎదురు చూస్తున్నారు. తమిళ తంబీలే కాదు, 'వీరమ్‌', వేదాలమ్‌' సినిమాలతో తెలుగులో కూడా మార్కెట్‌ బలంగా ఉంది అజిత్‌కి. ఈ సినిమాలు తెలుగులోనూ విడుదలయ్యాయి. అందుకే తెలుగులో కూడా అజిత్‌ 'వివేగం' సినిమాపై భారీగా అంచనాలున్నాయి. ఈ సినిమాని ఆగష్టులో ప్రేక్షకుల ముందుకు తీసుకొచ్చేందుకు సన్నాహాలు చేస్తోంది చిత్ర యూనిట్‌. కాజల్‌ అగర్వాల్‌, అక్షర హాసన్‌ హీరోయిన్లుగా నటిస్తున్నారు. బాలీవుడ్‌ నటుడు వివేక్‌ ఒబెరాయ్‌ ఈ సినిమాలో అజిత్‌కి విలన్‌గా నటిస్తుండడం విశేషం.