వరుస పెట్టి సినిమాలు చేసేయ్యడమే కాదు తన ప్రతీ సినిమాకీ ఏదో విలక్షణం కోరుకునే నటుడు నారా రోహిత్‌. కమర్షియల్‌ కోణంలోంచే కాదు, ప్రేక్షకులకు ఏదో కొత్తగా చూపించాలనే తపనతో ఉంటాడు నారా రోహిత్‌ ఎప్పుడూ. అలా వచ్చిన సినిమాలే 'ప్రతినిధి', 'జ్యో అచ్చుతానంద' తదితర చిత్రాలు. ఇటీవలే 'అప్పట్లో ఒకడుండేవాడు' చిత్రంతో నారా రోహిత్‌ మంచి విజయం అందుకున్నాడు. ఈ సినిమాలో నారా రోహిత్‌ నెగిటివ్‌ రోల్‌లో కనిపించాడు. రోహిత్‌తో కలిసి మరో యంగ్‌ హీరో శ్రీ విష్ణు నటించాడు ఈ సినిమాలో. ఇదే కాంబినేషన్‌ మరోసారి సందడి చేయనుంది. ఈ ఇద్దరూ కలిసి నటిస్తున్న కొత్త చిత్రం 'వీర భోగ వసంతరాయలు'. ఇంద్ర సేన దర్శకుడిగా పరిచయం అవుతున్నాడు ఈ సినిమాతో. ఈ ఇద్దరు యంగ్‌ హీరోస్‌ది బెస్ట్‌ కాంబినేషన్‌. గత చిత్రం 'అప్పట్లో ఒకడుండేవాడు' సినిమాలో హీరో, విలన్‌ పాత్రలు పోషించిన వీరిద్దరూ ఈ సినిమాలో కొత్తగా కనిపించనున్నారట. ఈ సినిమాలో సీనియర్‌ నటి శ్రియ కీలకపాత్రలో కనిపిస్తోంది. మరో యంగ్‌ హీరో సత్యదేవ్‌ కూడా నటిస్తున్నాడు. 'జ్యోతిలక్ష్మీ' సినిమాలో ఛార్మికి జంటగా నటించాడు సత్యదేవ్‌. అంటే టోటల్‌గా ఇదో మల్టీస్టారర్‌ మూవీ అని చెప్పొచ్చు. మల్టీస్టారర్‌ మూవీస్‌కి ఎప్పుడూ ముందుంటాడు నారా రోహిత్‌. మల్టీస్టారర్‌ రోహిత్‌కి బాగా కలిసొస్తుంది కూడా. రోహిత్‌ నటించిన 'కథలో రాకుమారి' సినిమా త్వరలోనే విడుదలకు సిద్ధంగా ఉంది.