అక్కినేని అభిమానులు ఎంతగానో ఎదురు చూస్తున్న అక్కినేని అందగాడు అఖిల్‌ నటిస్తున్న తాజా చిత్రం ఫస్ట్‌లుక్‌ విడుదలైంది. 'తొలిప్రేమ' డైరెక్టర్‌ వెంకీ అట్లూరి దర్శకత్వంలో తెరకెక్కుతోన్న చిత్రం టైటిల్‌ లోగోతో కూడిన ఫస్ట్‌లుక్‌ టీజర్‌ని విడుదల చేసింది చిత్ర యూనిట్‌. గత కొంత కాలంగా ప్రచారంలో ఉన్న 'మిస్టర్‌ మజ్ను' టైటిల్‌నే ఈ సినిమాకి ఫిక్స్‌ చేశారు.

'ఏంటో ఈ ఇంగ్లీషు భాష. ఏదైతే మిస్‌ చేసుకోకూడదనుకుంటామో దాన్నే మిస్‌ అనాల్సి వస్తోంది..' అంటూ అఖిల్‌ చెప్పే డైలాగ్‌ టీజర్‌కి హైలైట్‌గా నిలిచింది. ఏదో జస్ట్‌ ఫస్ట్‌లుక్‌ విడుదల చేస్తారేమో అనుకుంటే, ఊహించని విధంగా ఓ చిన్నపాటి టీజర్‌ని విడుదల చేసి, అభిమానులను ఫుల్‌ ఖుషీ చేసింది అక్కినేని ఫ్యామిలీ. అఖిల్‌ క్యారెక్టర్‌ ఇదీ అంటూ టీజర్‌లో చెప్పకనే చెప్పేశారు. పక్కా రొమాంటిక్‌ ఎంటర్‌టైనర్‌గా ఈ సినిమా తెరకెక్కుతోందని ఈ టీజర్‌ చూస్తే అర్ధమైపోతోంది.

తొలి సినిమా 'అఖిల్‌'తోనూ, రెండో సినిమా 'హలో'తోనూ వెరైటీ రోల్స్‌తో అలరించిన అఖిల్‌, ఈసారి సైతం ఇంప్రెసివ్‌ లుక్‌తోనే ప్రేక్షకుల ముందుకొస్తున్నట్లు అన్పిస్తోంది. సరైన కమర్షియల్‌ కొట్టాలనే కసితో వున్న అఖిల్‌కి ఈసారి ఆ కోరిక నెరవేరేలా వుందని టీజర్‌ని చూసినవారంతా అంటున్నారు.