యంగ్‌ హీరోగా తెరంగేట్రం చేసెయ్యడానికి అకిరానందన్‌కి పెద్దగా సమస్యలేం లేవు. కోరుకుంటే, ఇప్పటికిప్పుడు 'మెగా ఎంట్రీ' లభించేస్తుంది సినీ పరిశ్రమలో ఈ మెగా పవర్‌ హీరోకి. మెగా పవర్‌ స్టార్‌ రామ్‌చరణ్‌, కొణిదెల ప్రొడక్షన్స్‌ కంపెనీ పతాకంపై అకిరానందన్‌ని లాంఛ్‌ చేయబోతున్నాడనే ప్రచారం చాలాకాలంగా జరుగుతోంది. అయితే, పవన్‌ కళ్యాణ్‌ క్రియేటివ్‌ వర్క్స్‌ బ్యానర్‌పై అకిరానందన్‌ని పరిచయం చేస్తారనే ఊహాగానాలూ వినిపిస్తున్నాయి. తాజాగా తన తండ్రి పవన్‌ కళ్యాణ్‌ వెంట, అకిరానందన్‌ దర్శనమిచ్చేసరికి.. అకిరానందన్‌ సినీ రంగ ప్రవేశంపై చర్చ మరింత జోరుగా సాగుతోంది.
పెదనానన్న నాగబాబు కుమార్తె నిహారిక పెళ్ళిలో అకిరానందన్‌ హల్‌చల్‌ చేసేస్తున్నాడు. నిజానికి, అకిరానందన్‌ ఈ మెగా ఈవెంట్‌లో సెంటర్‌ ఆఫ్‌ ఎట్రాక్షన్‌గా మారాడనే చెప్పాలి. మెగా కాంపౌండ్‌కి చెందిన సెలబ్రిటీలంతా అకిరానందన్‌ చుట్టూ చేరుతున్నారు. అయితే, అకిరానందన్‌ మాత్రం తన తండ్రిలానే చాలా మొహమాటస్తుటడట.
కలివిడగా వుంటూనే, తనదైన లోకంలోకి వెళ్ళిపోతున్నాడట అకిరానందన్‌. ఇదంతా ఆఫ్‌ స్క్రీన్‌ వ్యవహారం మాత్రమే. తెరపై మాత్రం, పవన్‌ కళ్యాణ్‌కి మించి ఎనర్జీతో కన్పిస్తాడంటూ అకిరానందన్‌ని దగ్గరగా చూసినవాళ్ళంతా అంచనా వేస్తున్నారు. అన్నీ కుదిరితే, 2021 ప్రథమార్థంలోనే అకిరానందన్‌ తెరంగేట్రంపై ఓ ప్రకటన రావొచ్చని తెలుస్తోంది.
