ప్ర‌స్తుతం పుష్ష‌తో బిజీగా ఉన్నాడు అ్ల‌లు అర్జున్‌. ఈ సినిమా రెండు భాగాలుగా రాబోతున్న సంగ‌తి తెలిసిందే. పుష్ష 1 కీ పుష్ష 2కీ మ‌ధ్య క‌నీసం 6 నెల‌ల స‌మ‌యం ఉంటుంది. ఈ గ్యాప్ లో మ‌రో సినిమా చేయాల‌న్నది బ‌న్నీ ఆలోచ‌న‌. అందుకే `ఐకాన్‌` అనే స‌బ్జెక్ట్ ని ప‌క్క‌న పెట్టుకున్నాడు. అయితే సుకుమార్‌కి... ఇది ఇష్టం లేదు. పుష్ష 1 త‌ర‌వాత పుష్ష 2ని విడుద‌ల చేయాల‌ని, రెండింటి మ‌ధ్యా బ‌న్నీ మ‌రో సినిమా చేయకూడ‌ద‌ని, అలా చేస్తే.. క్యారెక్ట‌ర్ మూడ్ డిస్ట్ర‌బ్ అవుతుంద‌న్న‌ది సుకుమార్ భ‌యం. మైత్రీ మైవీస్ కూడా అలానే అనుకుంటోంది. ఇదే విష‌యాన్ని బ‌న్నీ ద‌గ్గ‌ర‌కు తీసుకెళ్లారు నిర్మాత‌లు. సుకుమార్ కూడా బ‌న్నీకి న‌చ్చ‌జెప్ప‌డానికి ప్ర‌య‌త్నించాడు. కానీ... బ‌న్నీ మాత్రం త‌న పంతాన్ని నెర‌వేర్చుకుంటున్నాడు.

ఈ క్రిస్మ‌స్ కి పుష్ష విడుద‌ల కాబోతోంది. ఆ వెంట‌నే.. ఐకాన్ ని మొద‌లెట్టేస్తాడ‌ట బ‌న్నీ. పుష్ష 2 కి సంబంధించిన చిత్రీక‌ర‌ణ మొద‌లయ్యే స‌రికి ఐకాన్ ని పూర్తి చేయాల‌న్న‌ది బ‌న్నీ ఆలోచ‌న‌. అయితే ఐకాన్ మాత్రం పుష్ష 2 విడుద‌లైన త‌ర‌వాతే వ‌స్తుంది. కాక‌పోతే రెండు సినిమాల మ‌ధ్య‌లో బ‌న్నీ మ‌రో సినిమా చేసేస్తున్నాడంతే. ఐకాన్ కి వేణు శ్రీ‌రామ్ ద‌ర్శ‌కుడు. దిల్ రాజు నిర్మాత‌. పాన్ ఇండియా స్థాయిలో ఈ చిత్రాన్ని తెర‌కెక్కిస్తున్నారు. త‌మ‌న్ సంగీతం అందిస్తాడ‌ని టాక్‌.