'సెలవే లేని సైనికా.. పనిలో పరుగే తీరికా ఓ సైనికా..ప్రాణం అంత తేలికా ఓ సైనికా..' అంటూ సాగే పాట వింటుంటే మనకు తెలీకుండానే రోమాలు నిక్కబొడుచుకుంటాయి. స్టైలిష్‌ స్టార్‌ అల్లు అర్జున్‌ హీరోగా తెరకెక్కుతోన్న 'నా పేరు సూర్య నా ఇల్లు ఇండియా' చిత్రంలోనిదీ పాట. టీజర్‌ విడుదలైన కొద్ది గంటల్లోనే నాన్‌ బాహుబలి రికార్డుల్ని కొల్లగొట్టేసింది. 

టీజర్‌కి వచ్చిన వ్యూస్‌ చూస్తేనే ఈ సినిమా రికార్డు స్థాయిలో హిట్‌ కొట్టడం ఖాయమని అంచనాలు వేస్తున్నారు. స్టైలిష్‌ స్టార్‌ అల్లు అర్జున్‌ సైనికుడిగా తన సత్తా చాటాలనుకుంటున్నాడు ఈ సినిమాతో. ఎన్నో సక్సెస్‌ ఫుల్‌ చిత్రాలకు రచయితగా పని చేసిన వక్కంతం వంశీ డైరెక్టర్‌గా మారి తెరకెక్కిస్తున్న తొలి చిత్రమిది. అల్లు అర్జున్‌ నటన గురించి, స్టైల్‌ గురించీ, డాన్సుల గురించి మనకందరికీ తెలిసిందే. అయితే ఈ సినిమాలో కొత్త అల్లు అర్జున్‌ని చూడబోతున్నామట. తనలోని నటున్ని కొత్తగా ప్రేక్షకులకు పరిచయం చేసే సినిమా 'నా పేరు సూర్య నా ఇల్లు ఇండియా' అంటున్నాడు అల్లు అర్జున్‌. 

గతేడాది భారీ అంచనాలతో ప్రేక్షకుల ముందుకొచ్చిన 'డీజె - దువ్వాడ జగన్నాధమ్‌' ఆశించిన ఫలితాన్వివ్వలేదు బన్నీకి. దాంతో ఈ సారి సరికొత్త ప్లాన్‌తో వచ్చేస్తున్నాడు. 'రేసుగుర్రం' రేంజ్‌ని దాటి సక్సెస్‌ అందుకోవడానికి అల్లు అర్జున్‌ ముస్తాబవుతున్నాడు. హెయిర్‌ స్టైల్‌ నుండీ బాడీ లాంగ్వేజ్‌ వరకూ ఫుల్‌ మేకోవర్‌ కనిపిస్తోంది సూర్యగా బన్నీ పాత్రలో. కేవలం మనోడు సైనికుడు మాత్రమే కాదండోయ్‌, మంచి లవర్‌ కూడా. అలా అని డాన్సులేయడనుకుంటున్నారేమో. ఇరగదీసేస్తాడట. ఎప్పటిలాగే ఈ సినిమాలో కూడా కొత్త కొత్త స్టెప్పుల్ని పరిచయం చేయబోతున్నాడట. 

ఈ స్పెషల్‌ క్వాలిటీస్‌ జస్ట్‌ శాంపిల్‌కి మాత్రమే. సినిమాలో ఇంకా బోలెడన్ని స్పెషల్స్‌ ఉన్నాయి. ఆ స్పెషల్స్‌తో సందడి చేయడానికి సినిమా ఏప్రిల్‌ 27న ప్రేక్షకుల ముందుకు వచ్చేస్తోంది.