అల్లు అర్జున్ - సుకుమార్ సినిమాపై ఎన్ని డౌట్లో! అస‌లు ఈ కాంబినేష‌న్‌లో సినిమా ఉంటుందా, ఉండ‌దా? ఉంటే ఎప్పుడు వ‌స్తుంది? అంటూ ఎన్ని ప్ర‌శ్న‌లో. వాట‌న్నింటికీ చెక్ పెట్టే ప్ర‌య‌త్నం చేశారిద్ద‌రూ. ఈనెల 11న ఈ చిత్రాన్ని లాంఛ‌నంగా ప్రారంభిస్తున్న‌ట్టు ప్ర‌క‌టించారు. సో.. రూమ‌ర్ల‌కు తెర ప‌డిన‌ట్టే. ఈనెల 11న ఈ సినిమా ప్రారంభం అవుతున్న‌ప్ప‌టికీ.. సెట్స్‌పైకి ఎప్పుడు వెళ్తుందో ఇప్పుడే చెప్ప‌లేం. ఎందుకంటే ఓ వైపు త్రివిక్ర‌మ్ సినిమా ఇటీవ‌లే మొద‌లైంది. ఈ ద‌స‌రాకి విడుద‌ల అవుతుంది.

ఈ సినిమాతో పాటు సుకుమార్ సినిమానీ స‌మాంత‌రంగా చిత్రీక‌రించే అవ‌కాశాలు లేవు. ఎందుకంటే రెండు సినిమాల‌లోనూ బ‌న్నీ గెట‌ప్పులు వేరు వేరుగా ఉండ‌బోతున్నాయి. సుకుమార్ సినిమాలో పూర్తి గ‌డ్డంతో క‌నిపించ‌నున్నాడు బ‌న్నీ. త్రివిక్ర‌మ్ సినిమా షూటింగ్ అవ్వ‌గానే... సుక్కు కోసం బ‌న్నీ గెడ్డం పెంచాలి. ఆ త‌ర‌వాతే.. సినిమా మొద‌ల‌వుతుంది. అంటే.. ఇప్పుడు ఈ చిత్రాన్ని లాంఛ‌నంగా ప్రారంభించినా, సెట్స్ పైకి వెళ్ల‌డానికి టైమ్ ప‌డుతుంద‌న్న‌మాట‌. మ‌రోవైపు... సుకుమార్ ఇంకా స్క్రిప్టు ప‌నులు పూర్తి చేయలేద‌ని స‌మాచారం. సెకండాఫ్ కి ఇంకా మెరుగులు దిద్దుతూనే ఉన్నాడ‌ని తెలుస్తోంది