హీరోయిన్స్‌గా రాణిస్తూనే మరోవైపు నిర్మాతలుగా కూడా తమ అభిరుచిని చాటుకుంటున్నారు అందాల భామలు. ఆ లిస్టులో తమిళ డస్కీ బ్యూటీ అమలాపాల్‌ ఎప్పుడో ఎంట్రీ ఇచ్చేసింది. ఆల్రెడీ తమిళంలో ఆమె నిర్మాణంలో ఓ సినిమా షూటింగ్‌ జరుపుకుంటోంది. తెలుగులోనూ తన నిర్మాణ పనితనాన్ని చూపించాలనుకుంటోందట. త్వరలోనే అమలాపాల్‌ నిర్మాణంలో ఓ సినిమాకి రంగం సిద్ధమవుతోందట. ఓ కొత్త డైరెక్టర్‌ ఈ సినిమాతో పరిచయం కానున్నాడట. ఇటీవల అమలాపాల్‌, 'ఆమె' సినిమాతో ప్రేక్షకుల ముందుకొచ్చిన సంగతి తెలిసిందే.
ఈ సినిమాలో ఆమె న్యూడ్‌ షో సెన్సేషన్‌ కావడంతో, విడులకు ముందు విపరీతమైన హైప్‌ క్రియేట్‌ అయ్యింది. కానీ, విడుదలయ్యాక ఆ హైప్‌ని అందుకోలేకపోయింది 'ఆమె'. అయినా ఈ సినిమాతో అమలాపాల్‌ ఓ కొత్త సెన్సేషనే క్రియేట్‌ చేసింది. దాంతో ఆ క్రేజ్‌ని క్యాష్‌ చేసుకోవాలనే ఇక్కడ కూడా నిర్మాతగా తన సత్తా చాటాలనుకుంటోందట.
అయితే, ఈ సినిమాలో అమలాపాల్‌ నటిస్తుందా.? లేక తెలుగు నటీనటులెవరైనా నటిస్తారా.? అనే కన్‌ఫ్యూజన్‌ ఉంది. కానీ, అమలాపాల్‌ నటిస్తూ, ఈ సినిమా నిర్మించనుందనీ ఇన్‌సైడ్‌ సోర్సెస్‌ ద్వారా అందుతోన్న సమాచారం. తెలుగులో ప్రముఖ యంగ్‌ హీరో ఈ సినిమాలో నటించనున్నాడనీ ప్రచారం జరుగుతోంది. పూర్తి వివరాలు త్వరలో వెల్లడి కానున్నాయి. గతంలో అమలాపాల్‌ చరణ్‌తో 'నాయక్‌' సినిమాలోనూ, నాగచైతన్యతో 'బెజవాడ' చిత్రంలోనూ నటించిన సంగతి తెలిసిందే.
