ఏడు పదుల వయసులోనూ బిగ్‌బీ అమితాబ్‌ బచ్చన్‌ ఉత్సాహంగా సినిమాలు చేస్తున్నారు. ఏదో నటించేశాంలే అని కాకుండా, విలక్షణ పాత్రలను ఎంచుకుంటున్నారు. తాజాగా ఇంతవరకూ ఆయన కనిపించని లుక్‌లో దర్శనమిచ్చి బిగ్‌బీ ఫ్యాన్స్‌కి సర్‌ప్రైజ్‌ ఇచ్చారు. తెల్లని పొడుగాటి గెడ్డం, గుండ్రని కళ్లజోడు, పెద్ద ముక్కు (ప్రోస్థటిక్‌ ముక్కు), తలకు వెరైటీ తలపాగాతో కురు వృద్ధునిగా అమాయకపు ఎక్స్‌ప్రెషన్‌తో కనిపిస్తున్నారు ఈ లుక్‌లో. ఫిలిం క్రిటిక్‌ తరణ్‌ ఆదర్శ్‌ ఈ లుక్‌ని తన ట్విట్టర్‌లో పోస్ట్‌ చేశారు.
ఇంతకీ ఈ లుక్‌ ఏ సినిమా కోసమంటే, ఆయుష్మాన్‌ హీరోగా తెరకెక్కుతోన్న 'గులాబో సితాబో' చిత్రంలోనిది. ఈ సినిమాలో బిగ్‌బీ కీలక పాత్ర పోషిస్తున్నారట. లక్నో పరిసర ప్రాంతాల్లో ఈ సినిమా శరవేగంగా షూటింగ్‌ జరుపుకుంటోంది. వచ్చే ఏడాది ఏప్రిల్‌లో ఈ సినిమా విడుదల కానుంది. కాగా, మరోవైపు బిగ్‌బీ తెలుగులో 'సైరా నరసింహారెడ్డి' చిత్రంలో నటిస్తున్న సంగతి తెలిసిందే.
ఈ సినిమాలోనూ బిగ్‌బీ గెటప్‌ కొంచెం ఇంచుమించు ఇదే తరహాలో ఉంటుంది. పొడుగాటి గెడ్డం, జుట్టు కూడా పొడుగ్గానే ఉంటుంది. నుదుటిపై ఎర్రటి సింధూరం పొడుగాటి బొట్టులా దిద్ది ఉంటుంది. ఈ సినిమాలో చిరంజీవికి గురువు పాత్రలో అమితాబ్‌ నటిస్తున్నారు. ఈ పాత్ర కూడా విభిన్నంగా ఉండే కీలక పాత్రే. ఈ సినిమా ఈ ఏడాది అక్టోబర్‌లో కానీ, వచ్చే ఏడాది సంక్రాంతికి కానీ విడుదల కానుంది.
