'సైజ్‌జీరో' సినిమా కోసం అనుష్క బాగా లావెక్కిన సంగతి తెలిసిందే. తీగలా సన్నగా ఉండే అనుష్క ఆ సినిమా కోసం చాలా కష్టపడి లావెక్కింది. దురదృష్టవశాత్తూ ఆ సినిమా ఆశించిన విజయాన్ని అందుకోలేకపోయినా, అనుష్క కష్టాన్ని మాత్రం ఎవ్వరూ మర్చిపోలేం ఆ సినిమాకి. ఆ తర్వాత అనుష్కను 'బాహుబలి ది కన్‌క్లూజన్‌' సినిమాలోనే చూశాం. అయితే ఈ సినిమా షూటింగ్‌ చాలా వరకూ ముందుగానే కంప్లీట్‌ అయిపోవడంతో, అనుష్క ఫిజిక్‌ ఈ సినిమాకి పెద్దగా అడ్డు పడలేదు. సూర్యతో నటించిన 'సింగం - 3'లోనూ అనుష్క కొంచెం బొద్దుగానే కనిపించింది. 'సైజ్‌జీరో' కోసం పెంచిన బరువును తగ్గించుకోవడానికి అనుష్క చాలానే కష్టపడింది. 

మొత్తానికి ఇప్పటికి తన రియల్‌ సైజ్‌కి వచ్చేసింది అనుష్క. తాజాగా సైజ్‌జీరోలో అనుష్క ఉన్న ఫోటో ఒకటి సోషల్‌ మీడియాలో హల్‌ చల్‌ చేస్తోంది. ఈ ఫోటోని అనుష్క స్వయంగా పోస్ట్‌ చేసింది. అయితే ఈ ఫోటోలో ఉన్నది అనుష్కయేనా అనే అనుమానాలు రాక తప్పడం లేదు. అంత సన్నగా సన్నజాజి నడుముతో మెరిసిపోతోంది అందాల అనుష్క. ప్రస్తుతం అనుష్క 'భాగమతి' సినిమాలో నటిస్తోంది. ఈ సినిమా కోసమే అనుష్క ఇంత సన్నబడిందనీ ప్రచారం నడుస్తోంది. 'పిల్లజమీందార్‌' ఫేం అశోక్‌ ఈ చిత్రాన్ని తెరకెక్కిస్తున్నారు. భారీ బడ్జెట్‌తో రూపొందుతోన్న చిత్రమిది. అలాగే డిఫరెంట్‌ కాన్సెప్ట్‌ మూవీ కూడా. 

'బాహుబలి' సినిమాతో యూనివర్సల్‌ స్టార్‌ హీరోయిన్‌ అనిపించుకున్న అనుష్క కెరీర్‌లో 'భాగమతి' కూడా ఓ మంచి సినిమాగా నిలవనుందని అంచనాలు వేస్తున్నారు. ఆల్రెడీ ఫస్ట్‌లుక్‌తో అంచనాల్ని పెంచేసింది అనుష్క. 'సైజ్‌జీరో' కోసం పెంచిన బరువును ఇన్నాళ్లకు తగ్గించుకుంది స్వీటీ బ్యూటీ. మొత్తానికి 'భాగమతి'లో స్లిమ్‌గా సైజ్‌జీరోలో ఉన్న అనుష్క అందాల్నే చూస్తామన్న మాట.