అభిమాన హీరో సినిమా టీజర్‌ వచ్చేస్తోందంటే అభిమానులు చేసుకునే పండగ అంతా ఇంతా కాదు. ఈ మధ్య అసలే టీజర్స్‌ కట్‌ చేసే విధానం ఓ రేంజ్‌లో ఉంటుంది. డైరెక్టర్స్‌ క్రియేటివిటీని మెచ్చుకోకుండా ఉండలేకపోతున్నాం. అలాంటిది క్రియేటివ్‌ డైరెక్టర్‌ పూరీ నుండి వస్తోన్న టీజర్‌ అంటే ఇక ఏ రేంజ్‌లో ఎక్స్‌పెక్టేషన్స్‌ ఉంటాయో ప్రత్యేకించి చెప్పనక్కర్లేదు. అయితే పూరీ ఇప్పుడు ఓ కొత్త మ్యాజిక్‌ చేయబోతున్నాడు. స్టంపర్‌ అనే కొత్త పదాన్ని తెలుగు సినీ పరిశ్రమకు పరిచయం చేశాడు. 'పైసావసూల్‌' సినిమాతో ఈ 'స్టంపర్‌'ని ప్రేక్షకుల ముందుకు తీసుకొస్తున్నాడు. స్టంపర్‌ అంటే ఇంకోటేదో కాదు, ట్రైలర్‌ కంటే తక్కువ నిడివితో, టీజర్‌ కంటే ఎక్కువ నిడివి ఉండే ఓ ప్రోమో అన్నమాట. ఫస్ట్‌ లుక్‌, ప్రీ లుక్‌, మోషన్‌ పోస్టర్‌, టీజర్‌, ట్రైలర్‌ ఇలాంటి పదాల్ని ఎప్పటినుంచో వింటున్నాం. 'పైసా వసూల్‌'తో ఇకపై 'స్టంపర్‌' ట్రెండ్‌ మొదలవుతుందని అనుకోవచ్చు. 'పైసావసూల్‌' స్టంపర్‌ అంటే టీజర్‌ కా బాప్‌, ట్రైలర్‌ కా బేటా అని పేర్కొంటూ పూరి జగన్నాథ్‌ ఓ చిన్న వీడియో విడుదల చేశాడు సోషల్‌ మీడియాలో. సింప్లీ సూపర్బ్‌గా ఉందది. ఈ నెల 28న 'పైసావసూల్‌' స్టంపర్‌ ప్రేక్షకుల ముందుకు రానుంది. బాలకృష్ణ హీరోగా నటిస్తున్నారు 'పైసావసూల్‌' సినిమాలో. శ్రియ, ముస్కాన్‌ హీరోయిన్లుగా నటిస్తున్నారు. కైరాదత్‌ ఐటెం సాంగ్‌ స్పెషల్‌ ఎట్రాక్షన్‌ కానుందట ఈ సినిమాలో.
