'రాజుగారి గది -2' సినిమాలో 'రన్‌ రాజా రన్‌' బ్యూటీ సీరత్‌ కపూర్‌ నటిస్తోన్న సంగతి తెలిసిందే. నాగార్జునతో ఆన్‌ స్క్రీన్‌ రొమాన్స్‌ చేస్తోంది ఈ బ్యూటీ ఈ సినిమాతో. ఈ సినిమాలో నటించడం తనకెంతో ఆనందంగా ఉందంటోంది. అంతే కాదు ఈ సినిమా కోసం అమ్మడు తెలుగు నేర్చుకుందట. తెలుగులో తన పాత్రకి తానే డబ్బింగ్‌ చెప్పుకుంది ముద్దుగుమ్మ సీరత్‌ కపూర్‌. నాగార్జున ప్రధాన పాత్రలో నటిస్తున్న సినిమా ఇది. సైకియాట్రిస్ట్‌ పాత్రలో నాగార్జున నటిస్తున్నారు. ముద్దుగుమ్మ సమంత ఇందులో కాస్సేపు కన్పించనుంది. కనిపించేది కాస్సేపే అయినా కానీ సినిమాలో అత్యంత కీలకమైన పాత్ర అట సమంతది. ఇక సీరత్‌ కపూర్‌ విషయానికొస్తే, 'రాజుగారి గది-2' సినిమా కోసం ఈ ముద్దుగుమ్మ ఎందుకు డబ్బింగ్‌ చెప్పాల్సి వచ్చిందంటే, ఆ పాత్రకు సొంత డబ్బింగ్‌ అయితేనే బాగుంటుందని దర్శకుడు ఓంకార్‌ చెప్పడం వల్లేనట. ఆ పాత్రకు డబ్బింగ్‌ చెబుతున్నప్పుడు చాలా ఇంట్రెస్టింగ్‌గా అనిపించిందట. ఆమె వాయిస్‌ కూడా బాగా అనిపించడంతో డైరెక్టర్‌ తననే డబ్బింగ్‌ చెప్పేందుకు ప్రోత్సహించారట. ఈ సినిమాతో తెలుగు భాషపై ఇష్టం పెరిగిపోయిందట సీరత్‌ కపూర్‌కి. ఇకపై తెలుగు పూర్తిగా నేర్చుకుని తెలుగులోనే డబ్బింగ్‌ చెప్పాలనుకుంటున్నట్లు వెల్లడించింది సీరత్‌కపూర్‌. మంచి విషయమే. సీనియర్‌ హీరోయిన్స్‌ కన్నా, ఇప్పుడొస్తున్న ముద్దుగుమ్మలే తెలుగు భాషపై మమకారం పెంచుకుని, తెలుగుపై పట్టు సాధిస్తుండడం విశేషం. ఈ సినిమా త్వరలోనే ప్రేక్షకుల ముందుకు రానుంది.
