పూరి జ‌గన్నాథ్ `ఇస్మార్ట్ శంక‌ర్‌` వ‌చ్చేవారం ప్రేక్ష‌కుల ముందుకు వ‌స్తుంది. ఈ సినిమా త‌ర‌వాత.. పూరి ప‌రిస్థితి ఏమిటి? అనేదే పెద్ద ప్ర‌శ్న. సినిమా హిట్ట‌యితే ఓకే. ఫ్లాప్ అయితే మాత్రం పూరి కెరీర్‌కి అది పెద్ద దెబ్బ‌గా మారుతుంది. ఇప్ప‌టికే పెద్ద హీరోలు పూరిని ప‌క్క‌న పెట్టేశారు. ఇప్పుడు మిగిలిన‌వాళ్లూ సైడ్ అయిపోతారు. కాక‌పోతే.. పూరి ఈ సినిమాపై బాగా న‌మ్మ‌కంతో ఉన్నాడు.
ఈ సినిమాతో హిట్టు కొట్టి మ‌ళ్లీ ఫామ్ లోకి రావ‌డం ఖాయం అంటున్నాడు. ఫ్లాప్ అయినా పూరి ముందు ఓ దారి ఉంది. ఆ దారి పేరు.. నంద‌మూరి బాల‌కృష్ణ. పూరితో క‌ల‌సి `పైసా వ‌సూల్‌` చేశాడు బాల‌య్య. ఆ సినిమా ఫ‌లితం అటూ ఇటూ అయినా, పూరి టేకింగ్‌పై బాల‌య్య‌కు పూర్తి న‌మ్మ‌కం వ‌చ్చింది. అందుకే.. పూరితో మ‌రో సినిమా చేయ‌డానికి ముందుకొచ్చాడు. అయితే ఆ ప్రాజెక్టు అనుకోకుండా ఆగిపోయి, కె.ఎస్ ర‌వికుమార్ సినిమా ప‌ట్టాలెక్కింది.
`ఇస్మార్ట్ శంక‌ర్‌` త‌ర‌వాత బాల‌య్య - పూరి కాంబో ఖాయ‌మ‌న్న‌ది టాలీవుడ్ జ‌నాల మాట. ఈ సినిమా హిట్ట‌యినా, ఫ్లాప్ అయినా పూరికి బాల‌య్య అవ‌కాశం ఇస్తాడ‌ని చెప్పుకుంటున్నారు. సో.... పూరి ఆశ‌ల‌న్నీ ఇక బాల‌య్య‌పైనే అన్న‌మాట.
