ఎస్వీ కృష్ణారెడ్డి డైరెక్షన్‌లో గతంలో చాలానే హిట్‌ చిత్రాలు వచ్చాయి. ఫ్యామిలీ ఎంటర్‌టైనింగ్‌ చిత్రాలకు ఎస్వీ కృష్ణారెడ్డి పెట్టింది పేరు. ఆయన డైరెక్షన్‌లో తాజాగా బాలయ్య ఓ చిత్రం చేయబోతున్నాడనీ ప్రచారం జరుగుతోంది. ఎస్వీ కృష్ణారెడ్డి చాలా కాలంగా సినిమాలు చేయడం లేదు. అయితే బాలయ్య కోసం ఓ మంచి స్క్రిప్ట్‌ ప్రిపేర్‌ చేశారనీ సమాచారమ్‌. గతంలో 'టాప్‌ హీరో' సినిమాని బాలయ్యతో తెరకెక్కించాడు కృష్ణా రెడ్డి. నాగార్జునతో 'వజ్రం' సినిమాను తెరకెక్కించాడు. లాంగ్‌ గ్యాప్‌ తర్వాత ఎస్వీ కృష్ణారెడ్డి సినిమా చేస్తున్నారంటూ వస్తున్న ప్రచారంలో నిజమెంతో కానీ, బాలయ్య మాత్రం దూకుడు మీదున్నారు. సెంచరీ కొట్టాక బాలయ్యలో జోరు అంతకంతకూ పెరిగిపోతోంది. అస్సలు గ్యాప్‌ లేకుండా సినిమాలు ఒప్పుకుంటున్నారు. ఇప్పటికే బాలయ్య చేతిలో రెండు సినిమాలున్నాయి. ఒకటి కె.యస్‌. రవికుమార్‌ దర్శకత్వంలో సినిమా కాగా, మరొకటి తేజ దర్శకత్వంలో తెరకెక్కుతోన్న సినిమా. కె.యస్‌.రవికుమార్‌ డైరెక్షన్‌లో తెరకెక్కుతోన్న సినిమాలో బాలయ్య పవర్‌ఫుల్‌ పోలీసాఫీసర్‌గా నటిస్తున్నారనీ తెలియవస్తోంది. 'జై సింహా' టైటిల్‌తో తెరకెక్కుతోన్న ఈ సినిమాకి సి. కళ్యాణ్‌ నిర్మాతగా వ్యవహరిస్తున్నారు. నయనతార హీరోయిన్‌గా నటిస్తోంది. ప్రస్తుతం ఈ సినిమా షూటింగ్‌ దశలో ఉంది. కాగా తేజ డైరెక్షన్‌లో ఎన్టీఆర్‌ బయోపిక్‌లో బాలయ్య నటిస్తున్నారు. 'ఎన్టీఆర్‌' టైటిల్‌తో తెరకెక్కుతోన్న ఈ సినిమా జనవరిలో సెట్స్‌ మీదికి వెళ్లనుంది. లీడ్‌ రోల్‌ పోషిస్తున్న బాలయ్య 'ఎన్టీఆర్‌' సినిమాకి నిర్మాతగానూ వ్యవహరిస్తున్నారు.