బాలయ్య హీరోగా తెరకెక్కుతోన్న 'ఎన్టీఆర్‌' చిత్రం ఆగిపోయిందని అనుకున్నారంతా. కానీ ఆ సినిమా ఆగిపోలేదట. ఈ నెల 29న సినిమా స్టార్ట్‌ చేయనున్నారట. వచ్చే ఏడాది సంక్రాంతికి ఈ సినిమాని ప్రేక్షకుల ముందుకు తీసుకొచ్చే యోచనలో చిత్ర యూనిట్‌ ఉందట. ఈ విషయాన్ని బాలయ్య స్వయంగా చెప్పారు. 

తేజ దర్శకత్వంలో తెరకెక్కుతోన్న ఈ సినిమాకు బాలయ్యే నిర్మాత. తొలి సారిగా నిర్మాతగా మారుతున్నారు బాలయ్య 'ఎన్టీఆర్‌' సినిమాతో. సంంక్రాంతి బాలయ్యకు బాగా కలిసొచ్చిన పండగ. అందుకే ప్రతీ సంక్రాంతికీ బాలయ్య నుండి ఏదో ఒక సినిమా ఉండేలా చూసుకుంటారు. ఈ సారి 'ఎన్టీఆర్‌' సినిమాని తీసుకురావాలనుకుంటున్నాడట. 

ఇదిలా ఉండగా, వర్మ తెరకెక్కించబోయే ఎన్టీఆర్‌ బయోపిక్‌ 'లక్ష్మీస్‌ ఎన్టీఆర్‌' కూడా త్వరలోనే పట్టాలెక్కనుందట. వర్మ ప్రస్తుతం తెరకెక్కిస్తున్న 'ఆఫీసర్‌' సినిమా త్వరలోనే షూటింగ్‌ కంప్లీట్‌ చేసుకోనుందట. ఇది పూర్తి కాగానే వెంటనే 'లక్ష్మీస్‌ ఎన్టీర్‌'పై వర్మ దృష్టి పెట్టనున్నారట. మరో పక్క కేతిరెడ్డి జగదీశ్వరరెడ్డి దర్శకత్వంలో తెరకెక్కాల్సిన 'లక్ష్మీస్‌ వీరగ్రంధం' సినిమా ఆల్రెడీ స్టార్ట్‌ అయ్యిందని దర్శకుడు చెప్పాడు. కానీ ఆ సినిమా ఎంతవరకూ వచ్చింది. ఏమైంది అనే అప్‌డేట్స్‌ తెలియవు. 

అయితే బాలయ్య 'ఎన్టీఆర్‌' పట్టాలెక్కగానే, ఈ రెండు సినిమాలు కూడా లైన్లోకి వచ్చేస్తాయి. సినిమా సంగతిలా ఉంచితే, బాలయ్య 2019లో ఎలక్షన్స్‌ నిమిత్తం రాజకీయాల్లో బిజీ కానున్న నేపథ్యంలో, రాబోయే ఎలక్షన్స్‌లోపే ఈ 'ఎన్టీఆర్‌' చిత్రాన్ని పూర్తి చేయాలని అనుకుంటున్నారట. చూడాలి మరి, ఎన్టీఆర్‌ బయోపిక్స్‌ ఏమవుతాయో ఎప్పటికి ప్రేక్షకుల ముందుకు వస్తాయో!