అ.ఆ త‌ర‌వాత స‌రైన హిట్టు ప‌డ‌లేదు నితిన్‌కి. శ్రీ‌నివాస క‌ల్యాణం అయితే మ‌రీ నిరాశ ప‌రిచేసింది. అయితే ఈ ఎఫెక్ట్ `భీష్మ‌`పై ఏమాత్రం ప‌డ‌లేదు. ఈ సినిమాకి అయిన ప్రీ రిలీజ్ బిజినెస్ వివ‌రాలు చూస్తే ఈ విష‌యం అర్థం అవుతుంది. నితిన్ - ర‌ష్మిక జంట‌గా న‌టించిన చిత్ర‌మిది. ఛ‌లోతో ఆక‌ట్టుకున్న వెంకీ కుడుముల ద‌ర్శ‌కత్వం వ‌హించారు. పాట‌లూ, ప్ర‌చార చిత్రాలూ ఆకట్టుకున్నాయి. అందుకే.. ఈ సినిమాకి మంచి బ‌జ్ ఏర్ప‌డింది. ఈ సినిమా థియేట్రిక‌ల్ రైట్స్ రూపంలో 24 కోట్లు సంపాదించింది. శాటిలైట్‌, డిజిట‌ల్‌, హిందీ డ‌బ్బింగ్ రైట్స్ రూపంలో మ‌రో 12 కోట్ల వ‌ర‌కూ వ‌చ్చిన‌ట్టు టాక్‌. అంటే మొత్తానికి 36 కోట్ల‌న్న‌మాట‌.

ఈ సినిమాతో రూ.10 కోట్ల టేబుల్ ప్రాఫిట్ ద‌క్కించుకున్న‌ట్టు స‌మాచారం. నైజాంలో 6.7 కోట్ల‌కు అమ్ముడైన ఈ సినిమా, ఓవ‌ర్సీస్‌లో 2.4 కోట్లు ప‌లికింది. సీడెడ్‌లో రూ.3 కోట్లు, ఉత్త‌రాంధ్ర‌లో 1.9 కోట్లకు కొన్నారు. ఏమాత్రం పాజిటీవ్ టాక్ వ‌చ్చినా.. బ‌య్య‌ర్ల‌కు సైతం రూపాయికి రూపాయి మిగ‌ల‌డం ఖాయ‌మ‌ని ట్రేడ్ వ‌ర్గాలు చెబుతున్నాయి. మ‌రి నితిన్ జాత‌కం ఎలా ఉంటుందో చూడాలి.