మ్యూజిక్ డైరెక్టర్ విజయ్ అంటోనీ హీరోగా నటించిన తమిళ డబ్బింగ్ ఫిలిం 'బిచ్చగాడు' 2016 లో బాక్స్ ఆఫీస్ దగ్గర సంచలన విజయం సాధించింది. ఆ సినిమా విజయం దెబ్బకు విజయ్ అంటోనీ సినిమాలకు తెలుగులో ఒక్కసారిగా డిమాండ్ పెరిగింది. అయితే ఆ సినిమా తర్వాత విజయ్ ఆంటోనీ సినిమాలు తెలుగు ప్రేక్షకులను మెప్పించలేకపోయాయి.
ఇప్పుడు నాలుగేళ్ల తర్వాత విజయ్ ఆంటోనీ 'బిచ్చగాడు' సీక్వెల్ తో ప్రేక్షకుల ముందుకు రానున్నాడు. తాజాగా ఈ సినిమాకు సంబంధించిన ఒక అప్డేట్ వచ్చింది. ఈ సినిమా ఫస్ట్ లుక్ ను విజయ్ ఆంటోనీ పుట్టిన రోజు సందర్భంగా జులై 24 వ తారీఖున విడుదల చేస్తామని మేకర్స్ ప్రకటించారు. ఈ సినిమాకు సంబంధించిన ఇతర వివరాలు పెద్దగా తెలియదు కానీ ఒరిజినల్ సినిమా డైరెక్టర్ శశి ఈ సీక్వెల్ కు దర్శకత్వం వహించడం లేదని మాత్రం కొద్దిరోజుల క్రితం విజయ్ ఆంటోనీ క్లారిటీ ఇచ్చారు.
'బిచ్చగాడు' సినిమాకు సంగీతం అందించడంతో పాటుగా విజయ్ ఆంటోనీ నిర్మాతగా కూడా వ్యవహరించాడు. ఈ సినిమాను కూడా విజయ్ తన సొంత బ్యానర్ పైనే నిర్మిస్తున్నారని సమాచారం.
