తాజాగా 'జయ జానకి నాయకా' సినిమాతో మంచి విజయం అందుకున్నాడు డైరెక్టర్‌ బోయపాటి శీను. అయితే ఆ తర్వాత బోయపాటి దర్శకత్వంలో రాబోతున్న సినిమా ఏంటి? ప్రస్తుతానికి సస్పెన్సే కానీ, నిజానికి మెగాస్టార్‌ చిరంజీవితో ఓ సినిమా చేయాల్సి ఉంది బోయపాటి. అలాగే బాలయ్యతోనూ ఓ సినిమా చేయాలి. బాలయ్య, బోయపాటి కాంబినేషన్‌కి భారీగానే అంచనాలుంటాయి. అయితే ప్రస్తుతం ఈ రెండూ కార్యరూపం దాల్చేలా కనిపించడం లేదు. ఓ పక్క చిరంజీవి 'ఉయ్యాలవాడ నర్సింహారెడ్డి' సినిమాతో బిజీగా ఉన్నాడు. 'మహావీర' టైటిల్‌ అనుకుంటున్నారు ఈ సినిమాకి. ఇంకా ఈ సినిమా పట్టాలెక్కలేదు. ఈ సినిమా పట్టాలెక్కి, నిర్మాణం పూర్తి చేసుకునేసరికి చాలానే టైం పట్టేలా ఉంది. ఇక బాలయ్య విషయానికి వస్తే ప్రస్తుతం పూరీతో 'పైసా వసూల్‌' సినిమా చేస్తున్నాడు బాలయ్య. ఈ సినిమా సెప్టెంబర్‌ 1న ప్రేక్షకుల ముందుకు వస్తోంది. తర్వాత వెంటనే మరో సినిమాకి రంగం సిద్ధం అయ్యింది. కె.ఎస్‌.రవికుమార్‌ దర్శకత్వంలో బాలయ్య సినిమా ఇటీవలే ప్రారంభోత్సవం జరిగింది. ఈ సినిమా అయిన తర్వాత కానీ బాలయ్య, బోయపాటికి అవకాశం ఇచ్చేది లేదు. ఇదంతా జరిగే వరకూ బోయపాటి గ్యాప్‌ తీసుకుంటాడా? లేక ఈ లోగా మరో హీరోతో సినిమా తెరకెక్కిస్తాడా చూడాలి. తాజాగా 'జయ జానకి నాయకా' సినిమా సక్సెస్‌ఫుల్‌గా ధియేటర్స్‌లో రన్‌ అవుతోంది. బెల్లంకొండ సాయి శ్రీనివాస్‌ హీరోగా రకుల్‌ ప్రీత్‌ సింగ్‌ హీరోయిన్‌గా తెరకెక్కింది ఈ సినిమా. కేథరీన్‌, ప్రగ్యా జైశ్వాల్‌ గెస్ట్‌ రోల్స్‌లో నటించారు.