స్టార్ హీరోతో సినిమా చేయాల‌ని ప్ర‌తి ద‌ర్శ‌కుడు క‌ల‌లు కంటుంటాడు. ఆ అవ‌కాశం ద‌ర్శ‌కుల‌కు ఈజీగానే వ‌చ్చేస్తోంది. ఓ సినిమా తీసి, హిట్టు కొడితే చాలు - స్టార్ హీరోల దృష్టిలో ప‌డిపోతున్నారు. ఉప్పెన‌తో.. బుచ్చిబాబు కూడా అలానే హీరోల్ని ఆక‌ట్టుకున్నాడు. ఎన్టీఆర్ నుంచి పిలుపు రావ‌డం, ఎన్టీఆర్ కి క‌థ చెప్ప‌డం, మైత్రీ మూవీస్ ఎన్టీఆర్ ని లాక్ చేయ‌డం చ‌క చ‌క జ‌రిగిపోయాయి. ఎన్టీఆర్ కోసం బుచ్చి ఓ స్పోర్ట్స్ డ్రామాని సిద్దం చేస్తున్న‌ట్టు వార్త‌లొచ్చాయి.
అయితే.. ఎన్టీఆర్ తో సినిమా అనుకున్నంత ఈజీ కాద‌న్న విష‌యం బుచ్చిబాబుకి ఇప్పుడిప్పుడే అర్థం అవుతోంది. ఎందుకంటే.. ఎన్టీఆర్ కోసం క‌థ‌లు త‌యారుచేసుకున్న ద‌ర్శ‌కుల లిస్టు చాంతాడంత ఉంది. త‌న కోటా రావాలంటే క‌నీసం రెండు నుంచి మూడేళ్లు స‌మ‌యం ప‌డుతుంది. అంత వ‌ర‌కూ ఎదురు చూసే ఓపిక బుచ్చిబాబుకి లేదు. నిజానికి త్రివిక్ర‌మ్ - ఎన్టీఆర్ సినిమా ఆగిపోయిన‌ప్పుడే.. బుచ్చి ప్రాజెక్టు ప‌ట్టాలెక్కాలి. కానీ... స‌డ‌న్ గా.. కొర‌టాల శివ వ‌చ్చి ఆ స్థానాన్ని ఆక్ర‌మించుకున్నాడు. ఆర్.ఆర్.ఆర్ పూర్త‌యిన వెంట‌నే కొర‌టాల శివ సినిమా మొద‌ల‌వుతుంది. ఆ త‌ర‌వాత.. ప్ర‌శాంత్ నీల్ ప్రాజెక్టు ఉంటుంది. అట్లీ కూడా... ఎన్టీఆర్ వెంట తిరుగుతున్నాడు. ఇవన్నీ అయ్యేంత వ‌ర‌కూ.. బుచ్చి ఎదురు చూడ‌లేడు. అందుకే.. `ఈ ఎదురు చూపులు నా వ‌ల్ల కాదు` అంటూ బుచ్చి చేతులు ఎత్తేసిన‌ట్టు టాక్‌. సో.. మైత్రీలో ఈ సినిమా ఆగిపోయింద‌ని, బుచ్చి మ‌రో హీరోని చూసుకోబోతున్నాడ‌న్న వార్తలు వినిపిస్తున్నాయి.
