సంక్రాంతి సందర్భంగా అల్లు అర్జున్‌ నటించిన 'అల వైకుంఠపురములో' చిత్రం ప్రేక్షకుల ముందుకు రానున్న సంగతి తెలిసిందే. ఈ సందర్భంగా ఇప్పటికే చిత్ర యూనిట్‌ ప్రమోషన్‌ కార్యక్రమాలు వేగవంతం చేసింది. ఎప్పటి నుండో వరుసగా ప్రమోషన్స్‌ కంటిన్యూ చేస్తూనే ఉంది. ఇక విడుదల దగ్గర పడుతున్న తరుణంలో భారీ ఎత్తున ఈవెంట్స్‌ ప్లాన్‌ చేసేందుకు 'అల..' టీమ్‌ సరికొత్త ప్రణాళికలు సిద్ధం చేస్తోందట. అందులో భాగంగా ఈ నెల 28న హైద్రాబాద్‌లో ఓ స్పెషల్‌ మ్యూజికల్‌ నైట్‌ ప్లాన్‌ చేస్తున్నారట. జనవరి 5వ తేదీన ప్రీ రిలీజ్‌ ఈవెంట్‌ని వైజాగ్‌లో చేసేందుకు సన్నాహాలు చేస్తున్నారట. ఈ ఈవెంట్‌కి మెగాస్టార్‌ చిరంజీవితో పాటు యంగ్‌ టైగర్‌ ఎన్టీఆర్‌ ముఖ్య అతిధులుగా విచ్చేయనున్నారనీ తెలుస్తోంది.
ఎన్టీఆర్‌ ప్రస్తుతం 'ఆర్‌ఆర్‌ఆర్‌' షూటింగ్‌ కోసం విశాఖలోని పాడేరు గ్రామంలో సందడి చేస్తున్న సంగతి తెలిసిందే. ఇటీవలే లొకేషన్‌ నుండి లీకైన ఎన్టీఆర్‌ ఫోటోలు నెట్టింట్లో హల్‌చల్‌ చేసిన సంగతి తెలిసిందే. ఇక మరోసారి అల్లు అర్జున్‌ ఈవెంట్‌లో ఎన్టీఆర్‌ అభిమానుల్ని ఆకట్టుకోనున్నారన్న మాట. ఇక ఇప్పటికే రిలీజైన'అల వైకుంఠపురములో..'ని పాటలు, టీజర్‌ ప్రేక్షకుల్ని ఉర్రూతలూగిస్తోంది. ఇక తదుపరి రిలీజ్‌ కానున్న ప్రచార చిత్రాలు ఎలా ఆకట్టుకోనున్నాయో చూడాలి మరి.
