చిరంజీవి సినిమాలో చరణ్, చరణ్ సినిమాలో చిరంజీవి క‌నిపించ‌డం ఈమ‌ధ్య కామ‌న్ అయిపోయింది. మ‌గ‌ధీర‌లో.. చిరు గెస్ట్ అప్పీరియ‌న్స్ ఇచ్చిన సంగ‌తి తెలిసిందే. అదే.. ఫార్ములా బ్రూస్లీలోనూ కంటిన్యూ చేశారు. ఖైదీ నెం.150లో రామ్ చరణ్ చిరుతో క‌లిసి స్టెప్పులేశాడు. ఆచార్య‌లో అయితే... దాదాపు చిరంజీవితో స‌మాన‌మైన పాత్ర‌నే పోషిస్తున్నాడు రామ్ చరణ్. అలా.. తండ్రీ కొడుకులిద్ద‌రూ తెర‌ని పంచుకోవ‌డం, ఫ్యాన్స్‌ని ఖుషీ చేయ‌డం అల‌వాటైపోయింది.
ఇప్పుడు మ‌రోసారి మెగా హీరోలిద్ద‌రూ క‌లిసి న‌టించ‌బోతున్నార‌ని టాక్‌. రామ్ చరణ్ క‌థానాయ‌కుడిగా కేజీఎఫ్ ద‌ర్శ‌కుడు ప్ర‌శాంత్ నీల్ ఓ సినిమా చేయ‌బోయే సంగ‌తి తెలిసిందే. స‌లార్ ముగిసిన వెంట‌నే చరణ్ తో ప్రాజెక్టు ప‌ట్టాలెక్కుతుంది. ఇందులో చిరంజీవి అతిథి పాత్ర‌లో క‌నిపించ‌నున్నాడ‌ని స‌మాచారం. ఇటీవ‌ల చిరు, చ‌ర‌ణ్‌ల‌ను క‌లిశాడు ప్ర‌శాంత్ నీల్. వీరిద్ద‌రికీ ఒకేసారి క‌థ కూడా చెప్పాడ‌ట. ఆ క‌థ వెంట‌నే ఓకే అయిపోయింది. చిరు కూడా అతిథి పాత్ర‌లో క‌నిపిస్తా అని మాట ఇచ్చాడ‌ట. ఇంకేముంది? ఈ మెగా కాంబో మ‌రోసారి చూడ‌డానికి సిద్ధ‌మైపోవాల్సిందే.
