అదేంటో గానీ విక్ర‌మ్‌కి ముందు నుంచీ గెట‌ప్పులంటే ఇష్టం. ఒక సినిమాలో ర‌క‌ర‌కాల గెట‌ప్పులేసి అల‌రిస్తుంటాడు. విక్ర‌మ్ సినిమా అనేస‌రికి.. `గెట‌ప్పులెన్ని` అనే ప్ర‌శ్న ఉద‌యిస్తుంటుంది. ఈసారీ ఆయ‌న గెట‌ప్పులు వేయ‌బోతున్నారు. రెండు కాదు, మూడు కాదు, ఏకంగా ఇర‌వై గెట‌ప్పులు.

విక్ర‌మ్ క‌థానాయ‌కుడిగా `కోబ్రా` అనే సినిమా తెర‌కెక్కుతోంది. అజయ్‌ జ్ఞానముత్తు దర్శకత్వం వ‌హిస్తున్నారు. ఇందులో విక్ర‌మ్ ఏకంగా 20 గెట‌ప్పుల‌లో క‌నిపించ‌నున్నాడ‌ట‌. ద‌శావ‌తారంలో క‌మ‌ల్ వేసింది ప‌ది గెట‌ప్పులే. అయినా అదో రికార్డు. ఇప్పుడు ఆ రికార్డుని విక్ర‌మ్ బ్రేక్ చేస్తున్నాడు. ఇప్ప‌టికే కొన్ని గెట‌ప్పుల్ని చిత్ర‌బృందం రివీల్ చేసింది. మిగిలిన‌వ‌న్నీ సినిమాలోనే చూపిస్తుంద‌ట‌. ఇదో సైక‌లాజిక‌ల్ థ్రిల్ల‌ర్ అని, అందుకే అన్ని గెట‌ప్పులు అవ‌స‌రం అయ్యాయ‌ని, అన్నీ క‌థ‌లో భాగంగానే వ‌స్తాయ‌ని చిత్ర‌బృందం చెబుతోంది. అన్న‌ట్టు.. ఈ సినిమాలో ఒక‌ప్ప‌టి క్రికెట‌ర్ ఇర్ఫాన్ ప‌ఠాన్ కూడా న‌టించ‌బోతున్నాడు. తాను ఇంట‌ర్ పోల్ అధికారిగా క‌నిపిస్తాడ‌ని స‌మాచారం.