హీరోగా ఛాన్సులు త‌గ్గిపోవ‌డం, హిట్లు ద‌క్క‌క‌పోవ‌డంతో... మళ్ళీ కామెడీ పాత్ర‌ల‌వైపు ట‌ర్న్ తీసుకున్నాడు సునీల్. అది ఓ విధంగా మంచిదే అయ్యింది. ప్రేక్ష‌కుల‌కు 'ట‌చ్‌'లో ఉంటూ నాలుగు డ‌బ్బులు వెన‌కేసుకుంటున్నాడు. దాంతో పాటు హిట్టూ, ఫ్లాపుల‌తో సంబంధం లేకుండా అవ‌కాశాల్ని అందుకుంటున్నాడు. ఇటీవ‌ల సునీల్ క‌మిడియ‌న్‌గా చేసిన అన్ని సినిమాలూ దాదాపుగా ఫ్లాపే అయ్యాయి. ఒక్క అరవింద సమేత మాత్ర‌మే ఓకే అనిపించింది. అందులో చేసిన నీలాంబ‌రి పాత్ర కూడా ఏమంత క్లిక్ కాలేదు.
అయినా స‌రే.. సునీల్‌కి అవ‌కాశాలు వ‌స్తూనే ఉన్నాయి. తాజాగా మ‌రో `మెగా` ఛాన్స్ కొట్టేశాడు. అల్లు అర్జున్ సినిమాలో ఓ కీల‌క పాత్ర‌లో న‌టిస్తున్నాడు. అల్లు అర్జున్ - త్రివిక్ర‌మ్ కాంబినేష‌న్‌లో ఓ సినిమా తెర‌కెక్కుతున్న సంగ‌తి తెలిసిందే. గీతా ఆర్ట్స్‌, హారిక హాసిని సంస్థ‌లు నిర్మిస్తున్నాయి. ఇందులో సునీల్ కూడా న‌టిస్తున్నాడు. సునీల్ - త్రివిక్ర‌మ్ బెస్ట్ ఫ్రెండ్స్‌. అందుకే.. త‌న ఫ్రెండు కోసం త్రివిక్ర‌మ్ ఓమంచి పాత్ర సృష్టిస్తున్నాడ‌ట. ఈ నెల‌లోనే ఈ సినిమా సెట్స్‌పైకి వెళ్ల‌నుంది.
