ఇదేం కొత్త స్లోగన్‌ ఇంతకు ముందెన్నడూ వినలేదే అనుకుంటున్నారా? అవునండీ ఇది కొత్త స్లోగన్‌. ది గ్రేట్‌ విఐపీ ధనుష్‌ చెప్పిన డైలాగ్‌. ధనుష్‌ హీరోగా 'విఐపీ' సినిమా తెరకెక్కుతోన్న సంగతి తెలిసిందే. 'రఘువరన్‌ బీటెక్‌' సినిమాకి సీక్వెల్‌గా తెరకెక్కుతోన్న సినిమానే ఈ 'విఐపీ'. ఈ సినిమా ట్రైలర్‌ తాజాగా విడుదలైంది. ఈ సినిమాలో బాలీవుడ్‌ సీనియర్‌ హీరోయిన్‌ కాజోల్‌ కీలక పాత్రలో నటిస్తోంది. తన గ్లామర్‌తో హీరోయిన్‌గా ఓ ఊపు ఊపేసిన ఈ ముద్దుగుమ్మ ఈ సినిమాలో విలన్‌గా నటిస్తోంది. ఓ కార్పోరేట్‌ కన్‌స్ట్రక్షన్‌ కంపెనీకి ఓనర్‌గా నటిస్తోంది కాజోల్‌. ఓ సందర్భంలో కాజోల్‌తో ధనుష్‌ చెప్పే డైలాగే ఇది. ఇంతకీ 'విఐపీ' అంటే ఏంటనుకుంటున్నారా? మీకు తెలిసిన మీనింగేం కాదండోయ్‌. దీనికి కూడా కొత్తర్ధం చెప్పాడు ధనుష్‌. 'వెరీ ఇంపార్టెంట్‌ పనిలేనోడు' అని. 'రఘువరన్‌ బీటెక్‌' సినిమాతో మంచి విజయం అందుకున్నాడు ధనుష్‌. ఈ సినిమాకి తమిళంతో పాటు, తెలుగులో కూడా మంచి విజయం దక్కింది. ఇప్పటికీ ఈ సినిమా బుల్లితెరపై ప్రదర్శితమయితే బోలెడన్ని రేటింగ్స్‌ వచ్చేస్తూంటాయి. అలాంటిది ఈ సినిమాకి సీక్వెల్‌ అంటే అంచనాలు భారీగా ఉన్నాయి. ఉండర్‌ బీర్‌ బ్యానర్‌లో ధనుష్‌ ఈ సినిమాని నిర్మిస్తున్నారు. సౌందర్యా రజనీకాంత్‌ దర్శకత్వంలో ఈ సినిమా తెరకెక్కుతోంది. అమలాపాల్‌, ధనుష్‌కి భార్యగా నటిస్తోన్న ఈ సినిమా త్వరలోనే ప్రేక్షకుల ముందుకు రానుంది.
