ఢీ... మంచు విష్ణు కెరీర్‌లో అతి పెద్ద హిట్ ఇదే. ఎలాంటి అచంనాలూ లేకుండా విడుద‌లై - సూప‌ర్ డూప‌ర్ హిట్ట‌యిపోయింది. ఈ సినిమాలోని సీన్లు.. ఇప్ప‌టికీ న‌వ్విస్తూనే ఉన్నాయి. ఈ సినిమాతో శ్రీ‌నువైట్ల రూటు మొత్తంగా మారిపోయింది. మెల్ల‌మెల్ల‌గా టాప్ డైరెక్ట‌ర్ అయిపోయారు. ఆ త‌ర‌వాత వ‌రుస‌గా పెద్ద హీరోల‌తోనే సినిమాలు తీశారు. ఇప్పుడు అటు విష్ణు.. ఇటు శ్రీ‌నువైట్ల ఇద్ద‌రూ లూప్‌లోనే ఉన్నారు. ప‌రాజ‌యాల్లో కూరుకుపోయారు. అందుకే వీరిద్ద‌రూ మ‌ళ్లీ క‌లిసి ప‌నిచేయాల‌నుకొన్నారు. అందులో భాగంగానే `డీ అండ్ డీ` బ‌య‌కు వ‌చ్చింది. ఢీకి సీక్వెల్ గా ఈ సినిమా రూపొందుతుంద‌ని చెప్పారు. అయితే... ఈ ప్రాజెక్టు ప్ర‌క‌టించి ఇంత కాల‌మైనా.. ఎలాంటి అప్ డేటూ రాలేదు. దాంతో ఈ సినిమాని ప‌క్క‌న పెట్టేశార‌ని చెప్పుకొంటున్నారు. ఈ నేప‌థ్యంలో ఢీ 2పై విష్ణు క్లారిటీ ఇచ్చారు.

ఈ సినిమా ప‌క్క‌న పెట్ట‌లేద‌ని, స్క్రిప్టుకి సంబంధించిన ప‌నులు ఇంకా జ‌రుగుతున్నాయ‌ని విష్ణు తెలిపారు. డిసెంబ‌రులో ఈ చిత్రానికి క్లాప్ కొడ‌తామ‌ని, కొత్త యేడాదిలో షూటింగ్ నిర్వ‌హిస్తామ‌ని తెలిపారు విష్ణు. ''క‌చ్చితంగా డీ కాంబినేష‌న్‌లో ఓ సినిమా ఉంటుంది. అయితే ఇది ఢీకి సీక్వెల్ కాదు. పూర్తిగా కొత్త క‌థ‌తో రూపొందిస్తున్నాం. ఈ సినిమా ఎప్పుడో మొద‌ల‌వ్వాల్సింది. కానీ.. క‌థ స‌రిగ్గా కుద‌ర్లేదు. ఇప్పుడు శ్రీ‌నువైట్ల క‌థ‌ని పూర్తి స్థాయిలో సిద్ధం చేశారు'' అని తెలిపారు విష్ణు.