స్వర్గీయ నందమూరి తారక రామారావు జీవిత గాధ ఆధారంగా తెరకెక్కిన 'ఎన్టీఆర్‌' బయోపిక్‌ ఇటీవల విడుదలై డిజాస్టర్‌గా మిగిలిన సంగతి తెలిసిందే. తేజ దర్శకత్వంలో మొదట అనౌన్స్‌ చేయబడిన ఈ సినిమా దర్శకత్వం నుండి తేజ తప్పుకుని, క్రిష్‌ వచ్చి చేరిన సంగతి కూడా విదితమే. ఓ సంచలనంగా మొదలైన ఈ సినిమా పేరు చెప్పి, ఎన్టీఆర్‌ని అవమానం పాలు చేశారంటూ వాదన వినిపించింది. ఇదిలా ఉంటే, తాజాగా ఈ సినిమాపై డైరెక్టర్‌ తేజ స్పందించారు.
ఈ సినిమాకి న్యాయం చేయలేననుకునే నా అంతట నేనుగా ఈ సినిమా డైరెక్షన్‌ నుండి తప్పుకున్నాను.. ఈ విషయం గతంలోనూ చెప్పాను. ఇప్పుడు మరోసారి చెబుతున్నాను. ఈ బయోపిక్‌ విషయంలో తెర వెనుక చాలా ఒత్తిడులు పని చేశాయి. ఆ ఒత్తిడులు తట్టుకోలేకనే నేను తప్పుకున్నాను. పాపం క్రిష్‌ బలైపోయారు. అలాంటి భయంకరమైన ఒత్తిడుల నడుమ తెరకెక్కి సినిమా డిజాస్టర్‌గా మిగిలింది.
ఒకవేళ క్రిష్‌ కాకుండా, నేనే ఈ సినిమాని తెరకెక్కించి ఉంటే, ఇంకా చెండాలంగా తెరకెక్కించి ఉండేవాడ్నేమో.. అని తేజ చెప్పారు. ప్రస్తుతం తేజ దర్శకత్వంలో 'సీత' సినిమా తెరకెక్కింది. ఈ సినిమా మే 24న ప్రేక్షకుల ముందుకు రానుంది. ఈ సందర్భంగా 'సీత' ప్రమోషన్స్‌లో పాల్గొన్న తేజ, ఎన్టీఆర్‌ బయోపిక్‌ విషయమై అడిగిన ప్రశ్నలకు తన మనసులోని మాటల్ని పై విధంగా మీడియాతో పంచుకున్నారు.
