నాని సినిమా వస్తుందంటే చాలు పిల్లా పెద్దా అందరికీ పండగే. ముఖ్యంగా పిల్లల హీరోగానూ, ఫ్యామిలీ హీరోగానూ నానికి మంచి క్రేజ్‌ ఉంది. అలాగే మాస్‌ హీరోగా కూడా. అయితే ఈ మధ్య నాని ఖాతాలో జమ అయిన హిట్స్‌ పరంపరకు తిరుగే లేకుండా పోతోంది. దాంతో నాని సినిమా వస్తుందంటే చాలు దానంతట అదే తెలియకుండానే హైప్‌ క్రియేట్‌ అయిపోతోంది. 

లాస్ట్‌ ఇయర్‌ వరుస హిట్స్‌తో దూస్కెళ్లిన నాని, ఈ సారి డబుల్‌ ధమాకా ఇస్తున్నాడు. అదే 'కృష్ణార్జున యుద్ధం'. మేర్లపాక గాంధీ ఈ చిత్రాన్ని తెరకెక్కిస్తున్నాడు. ఈ సినిమాలో నాని డబుల్‌ రోల్‌ పోషిస్తున్న సంగతి తెలిసిందే. కృష్ణ, అర్జున్‌ అనే ఈ రెండు పాత్రలతోనూ నాని ఫుల్‌గా ఎంటర్‌టైన్‌ చేస్తానంటున్నాడు. రెండు పాత్రలకూ వినోదం బాగా మేళవించారట. దాంతో హాట్‌ సమ్మర్‌లో కూల్‌ ఎంటర్‌టైనర్‌గా 'కృష్ణార్జున యుద్ధం' కొట్టుకెళ్లిపోయేలా ఉంది. ఈ సినిమాతో నానికి మరో హిట్‌ పక్కా అంటున్నారు. అనుపమా పరమేశ్వరన్‌, రుక్సార్‌ మీర్‌ ఇద్దరు కథానాయికలతో నాని జత కడుతున్నాడీ సినిమాలో. 

ఇప్పటికే రిలీజైన పాటలు మాస్‌ జనాల్లో విపరీతమైన క్రేజ్‌ సంపాదించుకున్నాయి. దిల్‌ రాజు సమర్పణలో ఈ సినిమా విడుదలవుతోంది. ఈ నెల 12న ప్రేక్షకుల ముందుకు రానుందీ చిత్రం. అన్నట్లు హీరోగానే కాకుండా, గతేడాది నిర్మాతగా కూడా నాని సత్తా చాటాడు 'అ' సినిమాతో. అలాగే ఈ ఏడాది కూడా నాని నిర్మాణంలో 'అ' లాంటి అద్భుతాలు ఏమైనా వస్తాయేయో చూడాలిక. మరో పక్క నాగార్జునతో, నాని మల్టీస్టారర్‌ తెరకెక్కుతోన్న సంగతి తెలిసిందే.