దుల్కర్ సల్మాన్.... ఈ మ‌ల‌యాళ హీరో పేరు తెలియ‌ని వాళ్లుండ‌రు. తెలుగులో చేసింది ఒక్క సినిమానే. అయినా స‌రే, మ‌న యంగ్ హీరోల‌కు త‌ల‌ద‌న్నే పాపులారిటీ సంపాదించుకొన్నాడు. త‌న డ‌బ్బింగ్ సినిమాల్ని సైతం.. ఎగ‌బ‌డి చూసే తెలుగు ప్రేక్ష‌కులు ఉన్నారు. ఓ ర‌కంగా చెప్పాలంటే దుల్కర్ తెలుగు హీరోలానే చ‌లామ‌ణీ అవుతున్నాడు. దుల్కర్ సల్మాన్ తో తెలుగులో నేరుగా ఓ సినిమా చేయాల‌ని చాలా మంది నిర్మాత‌లు, దర్శ‌కులు చాలా కాలంగా ప్ర‌య‌త్నిస్తూనే ఉన్నారు. అ అగ్ర నిర్మాణ సంస్థ అయితే.. కోరినంత అడ్వాన్స్‌ ఇచ్చి, దుల్కర్ కాల్షీట్లు బుక్ చేసుకోవ‌డానికి రెండేళ్లుగా విశ్వ ప్ర‌య‌త్నాలు చేస్తూనే ఉంది. కానీ ఎవ్వ‌రికీ.... ఎప్పుడూ.. అందుబాటులో లేని దుల్కర్ వైజ‌యంతీ మూవీస్‌కి మాత్రం వ‌రుస‌గా రెండు సినిమాలు చేసి ఆశ్చ‌ర్య‌ప‌రిచాడు. `మ‌హాన‌టి`లో ఓ కీల‌క పాత్ర పోషించిన దుల్కర్... ఇప్పుడు `సీతారామం`లో క‌థానాయ‌కుడిగా అవ‌తారం ఎత్తాడు. దుల్కర్ తెలుగులో హీరోగా చేసిన తొలి సినిమా సీతారామ‌మే.
ఏ క‌మ‌ర్షియ‌ల్ హీరోకీ తీసిపోని పాపులారిటీ దుల్కర్ సల్మాన్ సొంతం. క‌థ‌ల ఎంపిక‌లో... దుల్కర్ చాలా ఆచి తూచి అడుగులేస్తుంటాడు. త‌న‌ని తాను ఎప్పుడూ కొత్తగా ఆవిష్క‌రించుకొనే ప్ర‌య‌త్నం చేస్తుంటాడు. అలాంటి క‌థలు ఎప్పుడొచ్చినా.. స్వాగ‌తం ప‌ల‌క‌డానికి దుల్కర్ సిద్ధంగా ఉంటాడు. తెలుగులో ఎన్ని ఆఫ‌ర్లు వ‌చ్చినా కాదని... అప్పుడు `మ‌హాన‌టి` ఇప్పుడు `సీతారామం` చేయ‌డానికి కార‌ణం.. అలాంటి అద్భుత‌మైన క‌థ‌లే కావొచ్చు
పొరుగింటి నుంచి ఓ హీరో వ‌స్తున్నాడంటే, అక్క‌డి కంటే.. రెండు మూడు కోట్లు ఎక్కువే ఇచ్చి, రాచ మ‌ర్యాద‌ల‌తో స్వాగ‌తం ప‌ల‌క‌డం తెలుగు నిర్మాత‌ల‌కు అల‌వాటే. కానీ.. దుల్కర్ విష‌యంలో సీన్ రివ‌ర్స్ అయ్యింది. మ‌ల‌యాళంలో తాను అంకొంటున్న పారితోషికం కంటే... ఈ సినిమాకి గానూ రూ.2 కోట్లు త‌క్కువే తీసుకొన్న‌ట్టు ఇన్ సైడ్ వ‌ర్గాలు చెబుతున్నాయి. అంటే... ఓ ర‌కంగా.. దుల్కర్ త‌న పారితోషికాన్ని త‌న‌కు తానే త‌గ్గించుకొని .. వైజ‌యంతీ మూవీస్‌కి బంప‌ర్ ఆఫ‌ర్ ఇచ్చాడ‌న్న‌మాట. ఇది నిజంగా ఇప్పుడున్న తెలుగు యువ హీరోల‌కు ఇదో చుర‌క‌లాంటిదే. తమ డిమాండ్ ని వీలైనంత క్యాష్ చేసుకోవాల‌ని చూస్తున్న ఈత‌రం హీరోలు.. నిర్మాత ఎగ‌బ‌డి వ‌స్తున్నాడంటే అమాంతం తమ పారితోషికం పెంచేస్తుంటారు. కానీ దుల్కర్ మాత్రం త‌న పారితోషికాన్ని త‌గ్గించుకొని మ‌రీ నిర్మాత‌కు వెసులుబాటు క‌లిగించాడు. ఓ ర‌కంగా.. ఇది దుల్కర్ పాటిస్తున్న కొత్త స్ట్రాట‌జీ. `సీతారామం` హిట్ట‌యితే... దుల్కర్ తెలుగులో ఇప్పుడున్న సెకండ్ టైర్ హీరోల‌కు తిరుగులేని ఆప్ష‌న్‌గా మార‌తాడు. అందుకే మ‌న నిర్మాత‌లు చాలామంది.. `సీతారామం` ఫలితంపై ఓ క‌న్నేసి ఉంచారు. `సీతారామం`పై పాజిటీవ్ బ‌జ్ న‌డుస్తుండంతో.. దుల్కర్ ని బుక్ చేయ‌డానికి ముందే క‌ర్చీఫులు సిద్ధం చేసేసుకుంటున్నారు
