తెలుగమ్మాయ్‌ ఈషా రెబ్బ నటనలో రావల్సినంత గుర్తింపు దక్కించేసుకుంది. కానీ, క్షణం తీరిక లేకుండా అవకాశాలు దక్కించుకోవడంలో రేస్‌లో కాస్త వెనకబడిపోయిందంతే. వీలున్నంతలో వచ్చిన ప్రతీ అవకాశాన్నీ వినియోగించుకుంటూ, ముందుకెళుతోంది. ప్రస్తుతం ఈ తెలుగమ్మాయ్‌ 'రాగల 24 గంటల్లో' సినిమాలో నటిస్తోన్న సంగతి తెలిసిందే. ఇంతవరకూ కమర్షియల్‌ హీరోయిన్‌గా నటించిన ఈషా రెబ్బకు ఈ సినిమాతో ప్రాధాన్యత గల పాత్ర దక్కిందనే చెప్పాలి. పూర్తిగా హీరోయిన్‌ బేస్‌డ్‌ మూవీ ఇది.
సస్పెన్స్‌ థ్రిల్లర్‌ కాన్సెప్ట్‌తో రూపొందుతోంది. సత్యదేవ్‌ హీరోగా నటిస్తున్నాడు. ఈ సినిమాలో ఈషా పాత్ర చాలా కొత్తగా ఉండబోతోందట. ఓ సోషల్‌ కాజ్‌ కోసం పోరాడే యువతికి అనూహ్యంగా ఎదురైన ఓ సమస్య కారణంగా, ఎలాంటి చిక్కుల్లో పడింది. 24 గంటల్లో ఆ యువతి ఎలాంటి పరిస్థితుల్ని ఎదుర్కోవాల్సి వచ్చింది.. అనే పాయింట్‌ చుట్టూ ఈ కథ తిరుగుతుంది. ఆ క్రమంలో తెరకెక్కించిన హారర్‌ సన్నివేశాలు ఒళ్లు గగుర్పొడిచేలా ఉంటాయట. దాదాపు చివరి దశకు చేరుకున్న ఈ సినిమాని నవంబర్‌లో విడుదల చేసేందుకు సన్నాహాలు చేస్తున్నారు.
'ఢమరుకం' శ్రీనివాస్‌ రెడ్డి ఈ చిత్రానికి దర్శకుడు. ముస్కాన్‌ సేథి మరో హీరోయిన్‌గా నటిస్తోంది. ఇదిలా ఉంటే, తెలుగులోనే కాక తమిళ, కన్నడ భాషల్లోనూ అవకాశాల కోసం ప్రయత్నిస్తోంది ఈ తెలుగమ్మాయ్‌. సహజంగానే తెలుగమ్మాయిలకు తెలుగులో కన్నా, ఇతర భాషల్లోనే ఎక్కువ అవకాశాలు దక్కుతుంటాయి. అలాగే ఇతర భాషల్లో అదృష్టం పరీక్షించుకోవడానికి చూస్తోంది. ఆల్రెడీ తమిళ ప్రజలకు సుపరిచితమైన ఈషా రెబ్బ, త్వరలోనే కన్నడ బాబుల్ని కనువిందు చేయడానికి సిద్ధమవుతోంది.
