వర్కవుట్స్‌ చేస్తుండగా, చరణ్‌ మళ్లీ గాయపడ్డాడనీ, దాంతో ఇటీవల స్టార్ట్‌ అయిన 'ఆర్ఆర్ఆర్‌' షూటింగ్‌ మళ్లీ వాయిదా పడిందంటూ గాసిప్స్‌ పుట్టుకొచ్చాయి. దాంతో చిత్ర నిర్మాతలు స్పందించారు. చరణ్‌పై వస్తున్న గాసిప్స్‌లో నిజం లేదనీ, షూటింగ్‌కి ఎలాంటి అడ్డంకులూ లేవనీ, చరణ్‌ షూటింగ్‌లో పాల్గొంటున్నాడనీ నిర్మాత దానయ్య స్పష్టం చేశారు.
చరణ్‌ని టార్గెట్‌ చేసుకుని వస్తున్న ఈ గాసిప్స్‌ పట్ల మెగా అభిమానులు ఆందోళన వ్యక్తం చేస్తున్నారు. మరోవైపు 'ఆర్ఆర్ఆర్‌'కి వ్యతిరేకంగా దుష్ప్రచారం జరుగుతోందనీ రాజమౌళి, నిర్మాత దానయ్య ఆందోళన వ్యక్తం చేస్తున్నారు. ఈ క్రమంలోనే నిర్మాత దానయ్య ఈ గాసిప్స్‌ పట్ల స్పందించి క్లారిటీ ఇచ్చారు.
'ఆర్ఆర్ఆర్‌' మొదటి షెడ్యూల్‌ తర్వాత చరణ్‌ కాలికి గాయం కారణంగా షూటింగ్‌కి బ్రేక్‌ వచ్చిన సంగతి తెలిసిందే. ఆ తర్వాత ఎన్టీఆర్‌ చేతికి గాయం కారణంగా దాదాపు నెల రోజుల పైనే షూటింగ్‌కి బ్రేక్‌ వచ్చింది. వీరిద్దరూ గాయాల నుండి కోలుకున్నాక షూటింగ్‌ చాలా ఫాస్ట్‌గా జరుగుతోంది. అనుకున్న టైంకే సినిమాని విడుదల చేయాలన్న కసితో 'ఆర్ఆర్ఆర్‌' టీమ్‌ హార్డ్‌ వర్క్‌ చేస్తోందట.
వచ్చే ఏడాది జూలైలో ఈ సినిమా ప్రేక్షకుల ముందుకు రానుంది. ఎన్టీఆర్‌ కొమరం భీమ్‌ పాత్రలోనూ, చరణ్‌ అల్లు అర్జున్‌ పాత్రలోనూ కనిపిస్తున్న ఈ సినిమాలో అలియాభట్‌ చరణ్‌కి జోడీగా నటిస్తుండగా, ఎన్టీఆర్‌ సరసన ఎమ్మా రాబర్ట్స్‌ అనే విదేశీ భామను ఎంచుకున్నట్లు తాజాగా అందుతోన్న సమాచారమ్‌.
