'ఫలక్‌నుమా దాస్‌' చిత్రంతో హీరోగా, దర్శకుడిగా సంచలనం సృష్టించాడు విశ్వక్సేన్‌. ఇటీవల విడుదలైన ఈ సినిమా విమర్శకుల ప్రశంసలు అందుకుంది. ఈ సినిమా ప్రమోషన్స్‌లో భాగంగా మనోడు, విజయ్‌ దేవరకొండ అభిమానుల్ని కెలికాడంటూ, వివాదాల్లోకెక్కాడు కూడా. మొత్తానికి విమర్శలూ, వివాదాలూ, ప్రశంసలూ.. ఇలా అన్ని రకాల ఫ్లేవర్స్‌ పుణ్యమా అని విశ్వక్సేన్‌ పేరు జనంలో బాగానే నానింది.
ఇక ఈ కాంట్రవర్షియల్‌ హీరో ఇప్పుడు మరో కొత్త సినిమాతో రాబోతున్నాడు. మొన్న 'ఫలక్‌నుమా దాస్‌' అన్నాడు. ఇప్పుడు 'పాగల్‌' అంటున్నాడు. ఈ సినిమాకి నరేష్‌ రెడ్డి కుప్పిలి దర్శకుడు. బెక్కం వేణు గోపాల్‌ నిర్మాతగా లక్కీ మీడియా బ్యానర్‌లో ఈ సినిమా రూపొందుతోంది. హీరోగానే కాకుండా, దర్శకుడిగానూ మనోడిలో మంచి టాలెంట్‌ ఉందన్న సంగతి డైరెక్టర్‌గా తొలి సినిమా 'ఫలక్‌నుమా దాస్‌'తో ప్రూవ్‌ చేసుకున్నాడు.
ఇక ఈ సారి మరో కొత్త దర్శకుడిని ఇండస్ట్రీకి పరిచయం చేస్తున్నాడు. ఓ కొత్త లవ్‌ పాయింట్‌తో తెరకెక్కుతోన్న 'పాగల్‌' త్వరలో లాంఛనంగా ప్రారంభం కానుంది. రెగ్యులర్‌ షూటింగ్‌ సెప్టెంబర్‌ నుండి స్టార్ట్‌ కానుంది. హీరోయిన్‌ ఇతర టెక్నీషియన్ల వివరాలు త్వరలో వెల్లడి కానున్నాయి.
