మంచు మోహన్‌బాబు ప్రధాన పాత్రలో తెరకెక్కుతోన్న చిత్రం 'గాయత్రి'. ఈ సినిమా నుండి తాజాగా మరో ఫస్ట్‌లుక్‌ విడుదలైంది. ఇటీవల విడుదలైన మోహన్‌బాబు ఫస్ట్‌లుక్‌తో సినిమాపై అంచనాలు పెంచేశారు. తాజా లుక్‌లో మంచు విష్ణు, శ్రీయ కనిపిస్తున్నారు. ఫ్లాష్‌ బ్యాక్‌లో మంచు విష్ణు, శ్రీయ పాత్రలు కీలకంగా ఉంటాయట. ఇంతకు ముందు రిలీజైన లుక్‌లో పది తలలతో విష్ణు, ఆ పక్కనే కొంటెగా నిలబడిన శ్రియ లుక్‌కి మంచి రెస్పాన్స్‌ వచ్చింది. 

తాజా లుక్‌లో మంచు విష్ణు, శ్రియకు జడ అల్లుతూ కనిపిస్తున్నాడు. అంతేకాదు, 'ఇకపై ఇద్దరిదీ ఒకటే ప్రాణం..' అనే మెసేజ్‌ని కన్‌వే చేస్తున్నారు ఈ పోస్టర్‌ ద్వారా. నోట్లో దువ్వెన పట్టుకుని ఎంతో ప్రేమగా విష్ణు, శ్రియకి జడ అల్లుతున్న ఈ పోస్టర్‌ లుక్‌కి మంచి రెస్పాన్స్‌ వస్తోంది. హీరోగా, విలన్‌గా పలు విలక్షణ పాత్రలను విజయవంతంగా పోషించిన మోహన్‌బాబు చాలా కాలం తర్వాత లీడ్‌ రోల్‌లో నటిస్తున్న చిత్రం 'గాయత్రి'. సినిమా అన్ని వర్గాల్నీ మెప్పించేలా ఉండబోతోందట. 

'పెళ్లైన కొత్తలో', 'గరం' తదితర చిత్రాలను తెరకెక్కించిన మదన్‌ ఈ చిత్రాన్ని తెరకెక్కిస్తున్నారు. మోహన్‌బాబు లుక్‌ చూస్తుంటే, ఈ సినిమాలో ఆయన పాత్ర చాలా పవర్‌ఫుల్‌గా ఉంటుందనిపిస్తోంది. అలాగే విష్ణు, శ్రియల పాత్రలు విభిన్నంగా ఉండబోతున్నాయనీ తెలియవస్తోంది. అరియానా, వివియానా,విద్యా నిర్వాణా బ్యానర్‌పై మోహన్‌బాబు ఈ చిత్రాన్ని నిర్మిస్తున్నారు. 

హీరోయిన్‌ నిఖిలా విమల్‌, హాటెస్ట్‌ యాంకర్‌ అనసూయ భరద్వాజ్‌ ఈ సినిమాలో ఇతర ముఖ్య తారాగణంగా నటిస్తున్నారు. మరో పక్క విష్ణు 'ఆచారి అమెరికా యాత్ర' సినిమాతో బిజీగా ఉన్నాడు. ఇందులో ప్రగ్యా జైశ్వాల్‌ హీరోయిన్‌గా నటిస్తుండగా, బ్రహ్మానందం కీలక పాత్ర పోషిస్తున్నాడు.