అందాల తార శ్రీదేవి మరణంతో ఒక్కసారిగా షాక్‌కి గురైంది చిత్రసీమ. ఈ తరుణంలో శ్రీదేవి బయోపిక్‌ చర్చల్లోకొచ్చింది. ప్రముఖ నిర్మాత అశ్వనీదత్‌ శ్రీదేవి బయోపిక్‌ని నిర్మించే యోచనలో ఉన్నారంటూ గాసిప్స్‌ వస్తున్నాయి. టాలీవుడ్‌, బాలీవుడ్‌ అనే తేడా లేకుండా ఇప్పుడు శ్రీదేవి బయోపిక్‌ మీదే చర్చ జరుగుతోంది. ఓ పక్క సినీ ప్రముఖులు ఆమె మరణాన్ని ఇంకా నమ్మలేకపోతున్నారు.
ఇదంతా ఇలా ఉంటే, బాలీవుడ్‌ నుండి అయినా, టాలీవుడ్‌ నుండి అయినా శ్రీదేవికి ఓ భక్తుడున్నాడు. ఆయన ఇంకెవరో కాదు, సంచలనాల దర్శకుడు రామ్‌గోపాల్‌ వర్మ. ఈ తరహా హాట్‌ న్యూస్‌ ఏదైనా బయటికి వచ్చిందంటే చాలు బయోపిక్‌ అంటూ ముందుగా రేసులోకి దిగేది ఆయనే. అయితే ఆయన ఇంకా తన దేవత శ్రీదేవి మరణించింది అన్న షాక్‌లోంచి బయటికి రాలేదు. ఒకవేళ తేరుకోగానే ఆయన ఈ అనౌన్స్‌మెంట్‌ చేస్తారేమో చూడాలి మరి.
గతంలో తమిళనాడు ముఖ్యమంత్రి జయలలిత మరణానంతరం కూడా ఆయన వెంటనే స్పందించిన తీరు బయోపిక్‌ తెరకెక్కిస్తానన్న అనౌన్స్‌మెంట్‌తోనే. అయితే ఆ విషయం వేరు. ఈ విషయం వేరు. శ్రీదేవికి అపర భక్తుడాయన. అలాంటి శ్రీదేవి మరణ వార్త నుండి ఇంకా ఆయన తేరుకోలేదు కాబోలు. అందుకే ఆయన నుండి ఇలాంటి అనౌన్స్‌మెంట్‌ ఏదీ రాలేదని భావించాలి.
ఏది ఏమైనా శ్రీదేవి బయోపిక్‌ తెరకెక్కించేందుకు ఎందరో గొప్ప గొప్ప డైరెక్టర్లు కాచుకుని కూర్చుంటారంటే అతిశయోక్తి కాదు. ఒక్క భాషలోనే కాదు, ఏకంగా 8 భాషలకు పైగానే పలు చిత్రాల్లో నటించారు. అందంలో నిజంగా 'అతిలోకసుందరి'యే. ఆమె అందానికి, నటనకు సరిరారు వేరెవ్వరు..!
