నాగ అన్వేష్‌, హెబ్బా పటేల్‌ జంటగా తెరకెక్కుతోన్న చిత్రం 'ఏంజెల్‌'. ఇదో ఫాంటసీ మూవీ. మొదట్లో ఈ సినిమాని పెద్దగా పట్టించుకోలేదు. కానీ సినిమా విడుదల దగ్గరికి వచ్చేసరికి పబ్లిసిటీ ఎక్కువ చేశారు. దాంతో అందరి దృష్టినీ ఆకర్షిస్తోంది ఈ సినిమా. పళని దర్శకత్వంలో ఈ సినిమా తెరకెక్కుతోంది. ఈ రోజే ప్రేక్షకుల ముందుకు వస్తోంది ఈ చిత్రం. కాగా పబ్లిసిటీతో వచ్చిన హైప్‌ని బట్టి ఈ సినిమాకి ధియేటర్స్‌ వద్ద సందడి బాగానే నెలకొంది. 'కుమారి 21ఎఫ్‌' సినిమాతో తెరంగేట్రం చేసిన ముద్దుగుమ్మ హెబ్బా పటేల్‌కి ఈ సినిమా ఓ మంచి సినిమా కానుందని భావిస్తున్నారు. అయితే ఈ రోజు ప్రేక్షకుల ముందుకు వస్తోన్న ఈ సినిమా రిజల్ట్‌ కాస్సేపట్లో తేలనుంది. స్టామినాకి మించి సినిమాకి ఖర్చు చేశారు. దాదాపు 45 నిముషాల పాటు విజువల్‌ ఎఫెక్ట్స్‌ ఉండబోతున్నాయి ఈ సినిమాలో. హెబ్బా పటేల్‌ ఈ సినిమాకి మెయిన్‌ అట్రాక్షన్‌. 'కుమారి 21ఎఫ్‌' సినిమా తర్వాత హీరోయిన్‌ ప్రాధాన్యత ఉన్న క్యారెక్టర్‌లో హెబ్బా నటిస్తున్న చిత్రమిది. హెబ్బా ఈ సినిమాలో దివి నుండి భువికి దిగి వచ్చిన దేవకన్య పాత్రలో కనిపిస్తోంది. కానీ సినిమాలో ఎక్కువగా మామూలు అమ్మాయిగానే కనిపిస్తుంది. నాగ అన్వేష్‌ నటన ఆకట్టుకునేలా ఉండనుంది. సప్తగిరి తదితరులు పండించే కామెడీ సినిమాకి హైలైట్‌ కానుంది. సింపుల్‌గా సూపర్బ్‌గా తెరకెక్కించారు ఈ చిత్రాన్ని. విజువల్‌ సన్నివేశాల్ని ప్రోమోస్‌లో కట్‌ చేసిన తీరు ఎట్రాక్ట్‌ చేస్తోంది. ఇదే రోజు 'నెక్ట్స్‌ నువ్వే', రాజశేఖర్‌ 'గరుడ వేగ' సినిమాలు కూడా విడుదల కానున్నాయి. అయితే వీటి మధ్య 'ఏంజెల్‌' ఎంత మేర విజయం సాధిస్తుందో చూడాలిక.
