1996లో విడుద‌లైన `పెళ్లి సంద‌డి` ఎంత పెద్ద సంచ‌ల‌నం సృష్టించిందో ప్ర‌త్యేకంగా చెప్పాల్సిన ప‌నిలేదు. రాఘ‌వేంద్ర‌రావు మాయాజాలం, కీర‌వాణి సంగీతం, శ్రీ‌కాంత్ న‌ట‌న‌... ఇలా ఒక్క‌టేమిటీ... అన్నీ అదుర్సే. ఈ సినిమాతో శ్రీ‌కాంత్ స్టార్ గా మారిపోయాడు. ఇప్పుడు ఈ టైటిల్ తో రాఘ‌వేంద్ర‌రావు మ‌రో సినిమా తీస్తున్నారు. అతి త్వ‌ర‌లోనే షూటింగ్ మొద‌లు కాబోతోంది. పెళ్లి సంద‌డికి స్వ‌రాలు అందించిన కీర‌వాణినే ఈ చిత్రానికీ సంగీతం అందిస్తున్నారు. మ‌రి హీరో ఎవ‌రు? అనేదే ఆస‌క్తిక‌ర‌మైన ప్ర‌శ్న‌. ఈ సినిమాలో హీరో ఎవ‌ర‌న్న‌ది ఇంత వ‌ర‌కూ చెప్ప‌లేదు. త్వ‌ర‌లోనే వాళ్ల పేర్లు వెల్ల‌డిస్తామ‌న్నారు రాఘ‌వేంద్ర‌రావు.

అయితే ఈ సినిమాలో శ్రీ‌కాంత్ త‌న‌యుడు రోష‌న్ క‌థానాయ‌కుడిగా న‌టిస్తార‌ని వార్త‌లు వినిపిస్తున్నాయి. `నిర్మ‌లా కాన్వెంట్‌` తో ఎంట్రీ ఇచ్చాడు రోష‌న్‌. ఆసినిమా స‌రిగా ఆడ‌లేదు. రోష‌న్ హీరోగా నిల‌బ‌డాలంటే మంచి సినిమా ప‌డాలి అని భావిస్తున్నాడు శ్రీ‌కాంత్. ఈ ద‌శ‌లో పెళ్లి సంద‌డి ప్రాజెక్టు రోష‌న్ చేతిలోకి వెళ్లింద‌ని తెలుస్తోంది. శ్రీ‌కాంత్ కి స్టార్ డ‌మ్ తీసుకొచ్చిన పెళ్లి సంద‌డి - త‌న‌యుడి కెరీర్ నీ నిలబెట్ట‌బోతోందంటే.. అంత‌కంటే కావ‌ల్సిందేముంది? అయితే ఈ సినిమాలో హీరో రోష‌న్‌నా ఇంకెవ‌రైనా అన్న‌ది తెలియాలంటే ఇంకొన్ని రోజులు ఆగాలి.