క్రేజీ అండ్‌ హ్యాండ్‌సమ్‌ హీరోగా పేరు తెచ్చుకున్న జగపతిబాబును విలన్‌ జగ్గూ భాయ్‌గా మార్చేసిన ఘనత బోయపాటి శీనుకే దక్కుతుంది. 'లెజెండ్‌' సినిమాలో బాలయ్యకి ధీటైన విలన్‌గా జగపతిబాబు క్యారెక్టర్‌ని డిజైన్‌ చేసి, అందర్నీ ఆశ్చర్య పరిచాడు బోయపాటి శీను. ఇక ఇప్పుడు ఆయన ఫోకస్‌ మరో హ్యాండ్‌సమ్‌ హీరోపై పడింది. ఆయన మరెవరో కాదు, హీరో శ్రీకాంత్‌. ప్రస్తుతం బాలయ్య - బోయపాటి కాంబినేషన్‌లో తెరకెక్కబోయే చిత్రం కోసం విలన్ల ఎంపిక జరుగుతోంది. ఆల్రెడీ బాలీవుడ్‌ మున్నాభాయ్‌ సంజయ్‌దత్‌ పేరు పరిశీలనలో ఉంది. బోయపాటి సినిమా అంటే ఒకే ఒక్క విలన్‌ ఉండడు అన్న సంగతి తెలిసిందే. విలనిజం మరింత పవర్‌ఫుల్‌గా ఉండాలంటే, ఒకరికి తోడు ఇంకొక విలన్‌ కూడా ఉండాల్సిందే. అలా లోకల్‌ టాలెంట్‌లోని విలనిజాన్ని గుర్తించాడు బోయపాటి. ఎవరా లోకల్‌ టాలెంట్‌ అనుకుంటున్నారా.?
హీరో శ్రీకాంత్‌. ఈయనకు హీరోయిజంతో పాటు, విలనిజం కూడా కొత్తేం కాకపోయినా, హీరోగానే మంచి పేరు తెచ్చుకున్నాడు శ్రీకాంత్‌. అయితే, హీరోగా ప్రస్తుతం శ్రీకాంత్‌ కెరీర్‌ ఏమంత రైజింగ్‌లో లేదు. సో విలన్‌గా దారి మారిస్తే కెరీర్‌ గాడిన పడుతుందేమో చూడాలిక. ఈ మధ్య నాగచైతన్య హీరోగా తెరకెక్కిన 'యుద్ధం శరణం గచ్చామి' సినిమాలో శ్రీకాంత్‌ విలన్‌గా నటించాడు. కానీ, సినిమా ఫ్లాప్‌ అవ్వడంతో విలన్‌గా శ్రీకాంత్‌ క్యారెక్టర్‌ రిజిస్టర్‌ కాలేదు. కానీ, బోయపాటి హస్తవాసి చాలా మంచిది. ఆయన చెయ్యి పడ్డాకే, అంతంత మాత్రంగా ఉన్న జగ్గూభాయ్‌ కెరీర్‌ టర్న్‌ అయిపోయింది. అలాగే శ్రీకాంత్‌కి కూడా బోయపాటి హస్తవాసి పని చేస్తుందేమో చూడాలి మరి.
