హమ్మయ్యా.! ఎట్టకేలకు అఖిల్‌కి హీరోయిన్‌ దొరికేసింది. మొదటి మూడు సినిమాలతో వరుసగా నిరాశ పరిచిన అఖిల్‌ నాలుగో ప్రయత్నంగా రొమాంటిక్‌ డైరెక్టర్‌ బొమ్మరిల్లు భాస్కర్‌తో చేతులు కదిపాడు. ఇంతవరకూ అఖిల్‌ని హీరోగా చూపించిన డైరెక్టర్స్‌ అంతా సక్సెస్‌ఫుల్‌ డైరెక్టర్సే. ఫామ్‌లో ఉన్నవాళ్లే. అయినా వారి వల్ల కాలేకపోయింది అఖిల్‌కి హిట్‌ ఇవ్వడం. ఇక అప్పుడెప్పుడో 'బొమ్మరిల్లు' సినిమాతో హిట్టు కొట్టి, ఇప్పుడు ఫామ్‌లో లేని డైరెక్టర్‌ భాస్కర్‌ని ఏరి కోరి రంగంలోకి దించాడు అఖిల్‌. ఈ సారైనా హిట్‌ కొడతాడా? అంటే ఏమో అది అఖిల్‌ అదృష్టానికే వదిలేయాలి.
ఇకపోతే ఈ సినిమా స్టార్ట్‌ అయ్యి చాలా కాలమే అయ్యింది. కామ్‌గా షూటింగ్‌ కూడా జరిగిపోతోంది. కానీ, ఇంతవరకూ హీరోయిన్‌ ఫిక్స్‌ కాలేదు. బాలీవుడ్‌ భామల్ని పరిశీలించి, పరిశీలించి చివరాఖరికి టాలీవుడ్‌కే ఫిక్సయ్యారు. ప్రజెంట్‌ టాలీవుడ్‌లో స్టార్‌ హీరోయిన్‌ రేస్‌లో టాప్‌ ఛైర్‌ వైపు దూసుకెళుతున్న పూజా హెగ్దేని ఫైనల్‌ చేశారు. ఈ విషయాన్ని అధికారికంగా కన్‌ఫామ్‌ చేస్తూ, ఓ పోస్టర్‌ని కూడా రిలీజ్‌ చేశారు. మొత్తానికి అలా అఖిల్‌ హీరోయిన్‌ వేటకు ఫుల్‌ స్టాప్‌ అయితే. పడింది.
గీతా ఆర్ట్స్‌ 2 బ్యానర్‌లో అల్లు అరవింద్‌ ఈ సినిమాని నిర్మిస్తున్న సంగతి తెలిసిందే. మరోవైపు పూజా హెగ్దే ప్రస్తుతం అల్లు అర్జున్‌తో 'అల వైకుంఠపురములో' సినిమాలో నటిస్తోంది. అలాగే ప్రబాస్‌ సరసన 'జాన్‌' (వర్కింగ్‌ టైటిల్‌)లోనూ పూజా నటిస్తోంది. ఈ రెండు సినిమాలూ సెట్స్‌పైనే ఉన్నాయి. ఇక ముచ్చటగా మూడో సినిమాగా అఖిల్‌ కోసం సరికొత్తగా సెట్స్‌లోకి అడుగు పెట్టబోతోంది మన అందాల పూజా హెగ్దే.
