'ఎఫ్‌ 2' సూపర్‌ హిట్‌తో ఈ ఏడాది మంచి బోణీ కొట్టింది మిల్కీ బ్యూటీ తమన్నా. ఫేడ్‌ అయిపోయిందనుకున్న తరుణంలో కొత్త సంవత్సరంలో కొత్త కొత్తగా 'ఎఫ్‌ 2'తో బ్లాక్‌ బస్టర్‌ హిట్‌ కొట్టి, దటీజ్‌ తమన్నా అనిపించుకుంది. నెక్ట్స్‌ 'దటీజ్‌ మహాలక్ష్మి' అంటూ రాబోతోంది. బాలీవుడ్‌ 'క్వీన్‌'కి తెలుగు రీమేక్‌గా రానున్న ఈ సినిమాపై ఇప్పుడు అంచనాలు బాగా పెరిగాయి. అందుకు కారణం 'ఎఫ్‌ 2' హిట్టే అనడంలో సందేహం లేదు. 

'అ'తో డైరెక్టర్‌గా సత్తా చాటిన ప్రశాంత్‌ వర్మ ఈ సినిమాని తెరకెక్కిస్తున్నాడు. ఈ సినిమాలో తమన్నా రాజమండ్రి అమ్మాయిగా అలరించనుంది. ఈ సినిమాతో కూడా తమన్నా మంచి హిట్‌ కొట్టిందంటే ఇక ఇప్పట్లో ఆమె కెరీర్‌కి ఢోకా లేదనే చెప్పాలి. ఇదిలా ఉంటే, తమన్నా ఖాతాలోకి మరో స్టార్‌ హీరో మూవీ వచ్చి చేరిందనీ తెలుస్తోంది. ప్రస్తుతం స్టార్‌ హీరోలకు హీరోయిన్లు కొరత ఏ స్థాయిలో ఉందో ప్రత్యేకంగా చెప్పక్కర్లేదు. 

స్టార్‌ హీరోయిన్లు అని చెప్పుకోదగ్గ వారిలో తమన్నా, కాజల్‌ పేర్లు మాత్రమే ఇప్పుడు వినిపిస్తున్నాయి. అనుష్క ఆ లిస్టులో టాప్‌ ప్లేస్‌లో ఉన్నప్పటికీ, కొత్త ప్రాజెక్టుల విషయంలో అనుష్క అంత వేగం చూపించడం లేదు. సో జోరు మీదున్న భామల్లో తమన్నాకే ఎక్కువ ప్రాధాన్యత ఉంది. కాజల్‌కి ఈ మధ్య వరుస ఫెయిల్యూర్స్‌ రావడంతో, పెద్దగా పట్టించుకోవడం లేదు. సో 'ఎఫ్‌ 2' హిట్‌ తమన్నాకి బాగా కలిసొచ్చేసిందనే చెప్పాలి.