తొలిరోజు దాదాపు 13 కోట్ల గ్రాస్‌తో వ‌సూళ్ల‌తో షాక్ ఇచ్చాడు ఇస్మార్ట్ శంక‌ర్‌. ఈ ఊపు రెండో రోజూ కొన‌సాగింది. ప్ర‌పంచ వ్యాప్తంగా రెండో రోజూ ఇస్మార్ట్ దుమ్ము దులిపాడు. రెండో రోజు 12 కోట్ల వ‌సూళ్లు వచ్చాయి. దాంతో తొలి రెండు రోజుల‌కూ ఈ సినిమా 25 కోట్ల (గ్రాస్‌) తెచ్చుకోగ‌లిగింది. నైజాంలో 5.44 కోట్లు, సీడెడ్‌లో 2 కోట్లు, విశాఖ‌లో 1.5 కోట్లు వ‌చ్చాయి. ఓవ‌ర్సీస్ లెక్క‌లు ఇంకా బ‌య‌ట‌కు రావాల్సివుంది. శ‌ని, ఆదివారాలు మ‌రో 20 కోట్ల‌యినా చేసే అవ‌కాశం ఉంది.

అంటే.. తొలి నాలుగ రోజుల్లో దాదాపు 50 కోట్ల మార్క్‌ని చేరుకోబోతోంద‌న్న‌మాట‌. ఈమ‌ధ్య కాలంలో టాలీవుడ్‌లో ఇంత మాస్ సినిమా రాలేదు. పైగా థియేట‌ర్లో పూరి రాసిన డైలాగులు బాగా పేలుతున్నాయి. దాంతో... ఇస్మార్ట్‌కి బాగా ప్ల‌స్ అయిపోయింది. విమ‌ర్శ‌కులు ఈ సినిమాని సోసో సినిమాగా తేల్చేసినా, మాస్ మాత్రం నెత్తిమీద పెట్టుకుంటోంది. మ‌రి ఈ దూకుడు ఎన్ని రోజులు కొన‌సాగుతుందో చూడాలి.