'ఇస్మార్ట్‌ శంకర్‌' సినిమాకి మొదటి నుండీ ఓ రేంజ్‌లో పబ్లిసిటీ చేస్తున్నారు. ఈ సినిమాకి నిర్మాణ భాగస్వామి అయిన ఛార్మి సోషల్‌ మీడియాలో యాక్టివ్‌గా ఉంటుంది. అక్కడి నుండే సినిమాకి సంబంధించి ఎప్పటికప్పుడు అప్‌డేట్స్‌ ఇస్తూ వచ్చింది. ముహూర్తం షాట్‌ నుండీ, ఈ సినిమాకి వినూత్న రీతిలో ఛార్మి పబ్లిసిటీ చేస్తూ వచ్చింది. ఇక షూటింగ్‌ పూర్తి చేసుకుని సినిమా విడుదలకు సిద్ధమైంది. ఈ టైంలో స్క్రిప్టు లీక్‌ అయ్యిందంటూ సైబర్‌ క్రైమ్‌, పోలీసులు, కేసులు అంటూ కొత్త హడావిడి స్టార్ట్‌ చేశారు ఇస్మార్ట్‌ టీమ్‌. అయితే సినిమా ప్రమోషన్స్‌లో భాగంగా ఇలాంటి వివాదాలు కూడా సహజంగానే వినిపిస్తున్నాయి ఈ మధ్య. ఇదో కొత్తరకం పబ్లిసిటీ స్టంట్‌గా మారిపోయింది.
అదే ఇస్మార్ట్‌ టీమ్‌ కూడా ఫాలో చేసింది. అయితే ఇదంతా ఉత్తిదే అని తేలిపోవడమే కూసింత చివుక్కుమనిపిస్తోంది. కానీ సినిమాలో కంటెంట్‌ ఉంటే, ఎలాగైనా హిట్‌ కొట్టేస్తుంది. పక్కా మాస్‌ ఎంటర్‌టైనర్‌గా రూపొందిన 'ఇస్మార్ట్‌ శంకర్‌'లో రామ్‌ హీరోగా నటిస్తుండగా, నిధి అగర్వాల్‌, నభా నటేష్‌ హీరోయిన్లుగా నటిస్తున్నారు. పూరీ కనెక్ట్స్‌ బ్యానర్‌లో ఛార్మి, పూరీ జగన్నాధ్‌ కలిసి ఈ సినిమాని నిర్మించారు. మణిశర్మ బ్రాండ్‌లో మ్యూజిక్‌ బాణీలు ఆకట్టుకోనున్నాయి. ఇప్పటికే 'దిమాక్‌ ఖరాబ్‌..' వంటి సాంగ్స్‌ పూరీ ఫ్యాన్స్‌ని ఉర్రూతలూగిస్తుండగా, త్వరలో మరిన్ని మ్యాజిక్‌లు 'ఇస్మార్ట్‌ శంకర్‌' నుండి రానున్నాయట. లెట్స్‌ వెయిట్‌ అండ్‌ సీ.!
