'జై లవకుశ' ట్రైలర్‌తో సినిమాపై ఉన్న భారీ అంచనాలు మరింత రెట్టింపయ్యాయి. కళ్యాణ్‌రామ్‌ నిర్మాణంలో బాబీ తెరకెక్కిస్తోన్న చిత్రమిది. ఎన్టీఆర్‌ ట్రిపుల్‌ రోల్‌, మూడు పాత్రలు నువ్వా నేనా అన్నట్లుగా ఉన్నాయి. అయితే ట్రైలర్‌ వచ్చాక కొన్ని కొత్త అనుమానాలు రేకెత్తుతున్నాయి. ఇంతవరకూ నెగిటివ్‌ రోల్‌గా ప్రచారమైన 'జై' పాత్ర ఇప్పుడు రివర్స్‌ గేర్‌ వేసేసినట్లు కనిపిస్తోంది. 'జై' పాత్రకి నాటకాలంటే ఇష్టం. అందుకని నాటకాల్లో ఎప్పుడూ రావణుడి పాత్రలే వేస్తుంటాడు. అలాగని స్వతహాగా ఆ క్యారెక్టర్‌ అది కాదట. ఇక మిగిలిన రెండు పాత్రల్లో ఒకటి దొంగోడి పాత్ర. మరోటి అతి మంచోడి పాత్ర. ఈ రెండు పాత్రలూ కాస్త నాటీగా ఉన్నట్లు కనిపించాయి ఇంతవరకూ. అయితే ఈ రెండు పాత్రల కన్నా 'జై' పాత్రే ఎక్కువ నాటీ అని ట్రైలర్‌ చూస్తుంటే తెలుస్తోంది. ఈ పాత్ర ద్వారానే ఎక్కువ కామెడీ పుడుతుందట. అన్నట్లు ఈ పాత్రకి నత్తి కూడా. టోటల్‌గా సినిమా ఫుల్‌ లెంగ్త్‌ కామెడీతో, చక్కని ఫ్యామిలీ డ్రామాగా తెరకెక్కుతుందన్న సంగతి తెలుస్తోంది. ఇకపోతే గతంలో చిరంజీవి చేసిన 'ముగ్గురు మొనగాళ్లు' సినిమాతో ఈ సినిమాని పోల్చి చూసేస్తున్నారు కొందరు. అయితే ఆ సినిమాకీ, ఈ సినిమాకీ పోలిక లేదంటున్నారు మరికొందరు. ఏది ఏమైనా అభిమానులు పండగ చేసుకునేలానే 'జై లవకుశ' ఉండబోతోందంట. రాశీఖన్నా, నివేదా థామస్‌ హీరోయిన్లుగా నటిస్తున్నారు. ఈ ఇద్దరితో పాటు మరో ముద్దుగుమ్మ కూడా ఉందట. అయితే ప్రస్తుతానికి ఆ క్యారెక్ఱర్‌ని సస్పెన్స్‌గా ఉంచారట. ఎన్ని సస్పెన్స్‌లున్నా, మరి కొద్ది రోజుల్లోనే వాటన్నింటికీ తెర పడనుంది. మరో పది రోజుల్లోనే సినిమా రిలీజ్‌ కానుంది. ఈ నెల 21న 'జై లవకుశ' ప్రేక్షకుల ముందుకు రానుంది.