తొలి సినిమాకే స్టార్‌ హీరోయిన్‌తో, స్టార్‌ డైరెక్టర్‌తో పని చేసే ఛాన్స్‌ కొట్టేసి ఇండస్ట్రీ దృష్టిని ఆకర్షించిన యంగ్‌ హీరో బెల్లంకొండ శ్రీనివాస్‌. 'అల్లుడు శీను' సినిమాతో హీరోగా తెరంగేట్రం చేసిన ఈ యంగ్‌ హీరో తొలి సినిమా నుండీ, హీరోయిన్స్‌ ఎంపికలో హై రేంజ్‌లోనే ఉంటాడు. 'అల్లుడు శీను' టైంకి సమంత ఓ స్టార్‌ హీరోయిన్‌. తొలి సినిమాకే స్టార్‌ హీరోయిన్‌తో జత కట్టేశాడు. 

ఆ తర్వాత కూడా హీరోయిన్స్‌ ఎంపికలో మనోడు ఏమాత్రం తగ్గలేదు. లేటెస్టుగా 'జయ జానకీ నాయకా' సినిమా కోసం రకుల్‌ ప్రీత్‌ సింగ్‌ని దించిన సంగతి తెలిసిందే కదా. అయినా మనోడికి ఒక్క హీరోయిన్‌ కూడా చాలదండీ బాబు. తొలి సినిమాకి సమంతతో పాటు మరో స్టార్‌ హీరోయిన్‌ తమన్నాతో స్పెషల్‌ సాంగ్‌లో అదిరిపోయే స్టెప్పులేసి ఇరగదీసేశాడు. అలాగే 'జయ జానకీ నాయకా'లో రకుల్‌తో పాటు, కేథరీన్‌, ప్రగ్యాజైశ్వాల్‌ ఇలా ముగ్గురు ముద్దుగుమ్మలతో ఆడి పాడాడు మనోడు. 

ప్రస్తుతం 'సాక్ష్యం' సినిమాలో పూజా హెగ్దేతో కలిసి నటిస్తున్న బెల్లంకొండ, తదుపరి చిత్రాలను కూడా లైన్‌లో పెట్టేశాడట. 'రాజుగారి గది' సీక్వెల్స్‌తో విజయాలు అందుకున్న డైరెక్టర్‌ ఓంకార్‌తో ఓ సినిమా చేయనున్నాడట బెల్లంకొండ శ్రీనివాస్‌. తర్వాత నాని అనే ఓ కొత్త డైరెక్టర్‌ని ఇండస్ట్రీకి పరిచయం చేయబోతున్నాడు. ఈ యంగ్‌ డైరెక్టర్‌ బెల్లంకొండ కోసం అదిరిపోయే మాస్‌ మసాలా యాక్షన్‌ స్టోరీని ప్రిపేర్‌ చేశాడట. ఈ సినిమాలో బెల్లంకొండ ఏ హీరోయిన్‌తో నటిస్తున్నాడో తెలుసా? 

చందమామ బ్యూటీ కాజల్‌ అగర్వాల్‌ అని జోరుగా ప్రచారం జరుగుతోంది. కాజల్‌కి ఈ సినిమా కథ బాగా నచ్చడంతో సినిమాకి గ్రీన్‌ సిగ్నల్‌ ఇచ్చిందనీ తాజా సమాచారమ్‌. ప్రస్తుతం కళ్యాణ్‌రామ్‌తో 'ఎమ్మెల్యే' చిత్రంలో నటిస్తోంది కాజల్‌. ఇది కాక బాలీవుడ్‌లో కంగనా నటించిన 'క్వీన్‌' తమిళ రీమేక్‌లో కాజల్‌ కీ రోల్‌ పోషిస్తోంది.