చందమామ కాజల్‌ అగర్వాల్‌ త్వరలో 'రణరంగం' సినిమాతో ప్రేక్షకుల ముందుకు రానుంది. ఈ సినిమాలో కాజల్‌ అగర్వాల్‌ యంగ్‌ హీరో శర్వానంద్‌కి జోడీగా నటిస్తోన్న సంగతి తెలిసిందే. సుధీర్‌ వర్మ దర్శకత్వంలో ఈ సినిమా తెరకెక్కింది. ఈ సినిమాలో కాజల్‌తో పాటు, కళ్యాణీ ప్రియదర్శిన్‌ మరో హీరోయిన్‌గా నటిస్తోంది. అయితే, కళ్యాణీకే ఈ సినిమాలో ఎక్కువ నిడివి ఉంటుందట. కాజల్‌ పాత్రకు చాలా తక్కువ నిడివి ఇచ్చారట. అది తెలిసే కాజల్‌ ఈ సినిమాని ఒప్పుకుందట.
సీనియర్‌ అయినా, హీరోయిన్‌గా నిడివి తక్కువ పాత్రను అంగీకరించేందుకు ఒకే ఒక్క కారణముందని కాజల్‌ తాజాగా ఓ ఇంటర్వ్యూలో పేర్కొంది. సుధీర్‌ వర్మ తనకు నచ్చిన డైరెక్టర్‌ అనీ, ఆయనతో కలిసి వర్క్‌ చేయాలని ఎప్పటి నుండో అనుకుంటున్నాననీ, ఆ కోరిక 'రణరంగం'తో తీరనుందనీ కాజల్‌ చెప్పింది. అందుకే ఆయన అడగ్గానే వెంటనే ఈ క్యారెక్టర్‌కి ఓకే చేశాననీ కాజల్‌ చెప్పింది. అంతేకాదట. ఈ కాంబినేషన్‌లో త్వరలోనే ఫుల్‌ లెంగ్త్‌ హీరోయిన్‌గా మరో సినిమా చర్చల దశలో ఉందనీ కాజల్‌ వెల్లడించింది. ఇటీవల విడుదలైన 'రణరంగం' ట్రైలర్‌కి మంచి రెస్పాన్స్‌ వచ్చింది. ఇండిపెండెన్స్‌డే సందర్భంగా ఆగస్ట్‌ 15న 'రణరంగం' ప్రేక్షకుల ముందుకు రానుంది.
